ສໍານັກຂ່າວຕ່າງປະເທດ ໄດ້ລາຍງານວ່າ ທາງການຂອງປະເທດອິນເດຍອະນຸຍາດໃຫ້ນັກທ່ອງທ່ຽວຕ່າງຊາດທີ່ໄດ້ຮັບວັກຊີນປ້ອງກັນໂຄວີດ-19 ຄົບຖ້ວນ ສາມາດເດີນທາງເຂົ້າມາປະເທດໄດ້ອີກຄັ້ງໃນຮອບ 19 ເດືອນ ນັບຕັ້ງແຕ່ວັນທີ 15 ຕຸລາ 2021 ເປັນຕົ້ນໄປ ແລະ ຈະອະນຸຍາດໃຫ້ຜູ້ໂດຍສານຖ້ຽວບິນພານິດເຂົ້າປະເທດ ທັງນີ້ກໍເພື່ອຜ່ອນຄາຍມາດຕະການປ້ອງກັນໂຣກລະບາດ ຫຼັງຈາກທີ່ແນວໂນ້ມຜູ້ຕິດເຊື້ອປະຈໍາວັນຫຼຸດລົງເຫຼືອທີ່20,000 ຄົນຕໍ່ມື້ ຈາກແຕ່ກ່ອນທີ່ຍອດຜູ້ຕິດເຊື້ອສູງເຖິງ 400,000 ຄົນຕໍ່ມື້ ແລະ ປະຊາກອນຂອງປະເທດອິນເດຍເອງປະມານ 70% ແມ່ນໄດ້ຮັບວັກຊີນຢ່າງໜ້ອຍ 1 ເຂັມແລ້ວ.
ທັງນີ້ ການຜ່ອນຄາຍມາດຕະການຂໍ້ຈໍາກັດເກີດຂຶ້ນພ້ອມກັບການເລີ່ມຕົ້ນຂອງລະດູການທ່ອງທ່ຽວຂອງອິນເດຍ ຈຶ່ງເຮັດໃຫ້ເກີດມີຄວາມຫວັງໃນການຟື້ນໂຕຂອງອຸດສາຫະກໍາການທ່ອງທ່ຽວທີ່ມີບັນຫາ.
ຈາກຂໍ້ມູນລັດຖະບານອິນເດຍໄດ້ເປີດເຜີຍວ່າສາມາດດຶງດູດນັກທ່ອງທ່ຽວຕ່າງຊາດໃນປີກາຍໄດ້ພຽງ 2.74 ລ້ານຄົນ ເຊິ່ງຫຼຸດລົງຈາກປີ 2019 ທີ່ມີນັກທ່ອງທ່ຽວເຖິງ 10.93 ລ້ານຄົນ ເຊິ່ງສະທ້ອນໃຫ້ເຫັນວ່າໂຣກລະບາດເຮັດໃຫ້ຊີວິດ ແລະ ທຸລະກິດອິນເດຍປ່ຽນຈາກໜ້າມືເປັນຫຼັງມື.
ນອກຈາກນີ້ອຸດສາຫະກໍາການທ່ອງທ່ຽວເປັນໜຶ່ງໃນຜະລິດຕະພັນລວມພາຍໃນປະເທດ ຫຼື GDP ຂອງປະເທດອິນເດຍເກືອບເທົ່າ 7% ແລະ ຍັງຮອງຮັບວຽກງານໃນຫຼາຍຕໍາແໜ່ງທີ່ນອນຢູ່ໃນຂະແໜງບໍລິການ.