ບັນດາປະເທດເພື່ອນບ້ານທີ່ມີຊາຍແດນຕິດຈອດກັບປະເທດເບລາຣຸສ ໄດ້ກ່າວເຖິງວິກິດຜູ້ອົບພະຍົບຜ່ານຊາຍແດນ ທາງພາກຕາເວັນອອກຂອງສະຫະພາບເອີຣົບ ທີ່ອາດກາຍເປັນປັນຫາບາຍປາຍກ້າວໄປສູ່ການປະທະທາງການທະຫານ ຂະນະທີ່ຢູເຄຣນກຽມຈັດສົ່ງກຳລັງທະຫານຫຼາຍພັນຄົນໄປປະຈຳການຊາຍແດນເພື່ອເສີມກຳລັງຕ້ານກຸ່ມອົບພະຍົບ.
ສຳນັກຂ່າວ Reuters ລາຍງານວ່າ: ຜູ້ອົບພະຍົບທີ່ຕິດຄ້າງໃນເບລາຣຸສຫຼາຍພັນຄົນໄດ້ພາກັນຂວ້າງກ້ອນຫີນ ແລະກິ່ງໄມ້ໃສ່ເຈົ້າໜ້າທີ່ຮັກສາຄວາມປອດໄພຕາມຊາຍແດນຂອງປະເທດໂປແລນ ແລະໃຊ້ໄມ້ທ່ອນເພື່ອທຳລາຍຮົ້ວໜາມເພື່ອຈະເປີດທາງໃຫ້ພວກເຂົາສາມາດເຂົ້າໄປສະຫະພາບເອີຣົບໄດ້, ຂະນະທີ່ບັນດາປະເທດເພື່ອນບ້ານເບລາຣຸສ ເຊັ່ນ ລິທົວເນຍ, ເອສໂຕເນຍ ແລະລັດເວຍ ກ່າວເປັນສຽງດຽວກັນວ່າ ເບລາຣຸສໄດ້ຄຸກຄາມຄວາມໝັ້ນຄົງຂອງເອີຣົບຢ່າງຮ້າຍແຮງ ໂດຍເຈຕະນາເພີ່ມ “ການໂຈມຕີແບບໄຮບຣິດ” ໂດຍໃຊ້ຜູ້ອົບພະຍົບເປັນສາກບັງໜ້າເພື່ອຕອບໂຕ້ການຂວ້າມບາດຂອງສະຫະພາບເອີຣົບ.
ທ່ານ ອາເລັກຊານເດິ ລູກາເຊນໂກ, ປະທານາທິບໍດີເບລາຣຸສ ໄດ້ຂູ່ວ່າຈະດຳເນີນການຕອບໂຕ້ ລວມເຖິງປິດການຂົນສົ່ງແກ໊ສທຳມະຊາດຂອງຣັສເຊຍຜ່ານເບລາຣຸສ ທັງທີ່ຣັສເຊຍບໍ່ໄດ້ມີປະຕິກິລິຍາຕອບໂຕ້ໃດໆກັບປະເທດດັ່ງກ່າວ.