ອົງການສະຫະປະຊາຊາດ (ສປຊ) ໄດ້ເວົ້າເຖິງສະຖານະການດ້ານມະນຸດສະທຳໃນປະເທດມຽນມາປັດຈຸບັນກຳລັງຕົກຕໍ່າລົງ ໂດຍມີປະຊາກອນ 3 ລ້ານກວ່າຄົນໄດ້ຮັບຄວາມເດືອດຮ້ອນ ແລະຕ້ອງການຄວາມຊ່ວຍເຫຼືອອັນຮີບດ່ວນ ເນື່ອງຈາກຂໍ້ຂັດແຍ່ງທີ່ເພີ່ມທະວີຂຶ້ນ ຂະນະທີ່ເສດຖະກິດຊໍ້າພັດຍິ່ງຝືດເຄືອງ.

ອີງຕາມການລາຍງານຂອງ Channel News Asia, ທ່ານ ມາຕິນ ກຣິຟຟິດສ໌, ຫົວໜ້າໜ່ວຍງານຊ່ວຍເຫຼືອຂອງ ສປຊ ກ່າວວ່າ: ສປຊ ໄດ້ຮຽກຮ້ອງໃຫ້ກອງທັບມຽນມາເຄົາລົບເຈດຈຳນົງຂອງປະຊາຊົນພາຍໃນປະເທດ ພ້ອມນຳພາປະເທດຊາດກັບເຂົ້າສູ່ເສັ້ນທາງແຫ່ງການປ່ຽນແປງໃໝ່ນາມວ່າ ປະຊາທິປະໄຕ.

“ສະຖານະການທາງພາກຕາເວັນຕົກຂອງມຽນມາກຳລັງຕົກຢູ່ໃນສະພາບທີ່ໜ້າເປັນຫ່ວງ ເນື່ອງຈາກການຕໍ່ສູ້ກັນທີ່ຮຸນແຮງຂຶ້ນລະຫວ່າງກອງທັບມຽນມາ ກັບກອງກຳລັງປ້ອງກັນຊິນແລນ ໃນລັດຊິນ ລວມທັງພາກພື້ນມາເກວ ແລະສະກາຍ” ທ່ານ ກຣິຟຟິດສ໌ ກ່າວ.

ປະຊາຊົນ 37.000 ກວ່າຄົນ ລວມທັງແມ່ຍິງ ແລະເດັກນ້ອຍຈຳຕ້ອງຍ້າຍຖິ່ນຖານເພື່ອຫາທີ່ຢູ່ໃໝ່ ແລະບ້ານເຮືອນຈຳນວນ 160 ກວ່າຫຼັງ ລວມທັງໂບດ ແລະ ຫ້ອງການຂອງອົງການເພື່ອມະນຸດສະທຳ ກໍຖືກໄຟເຜົາເປັນເຖົ່າຖ່ານ.