ວັນ​ທີ 6 ພະຈິກ​ 2021 ສໍານັກຂ່າວ AP ​ໄດ້​ລາຍ​ງານ​ວ່າ ຜູ້​ເຂົ້າ​ຮ່ວມ​ງານເທດສະການ​ງານດົນຕີຈໍານວນຫຼາຍ ຢູ່ທີ່ ເມືອງ Houston ລັດ Texas ໃນ​ອາເມລິກາ ເຮັດໃຫ້ເກີດເຫດມີການຫຍຽບກັນ, ຂະນະນີ້ມີຜູ້ເສຍຊີວິດແລ້ວ 8 ກໍລະນີ 1 ໃນນັ້ນແມ່ນເດັກນ້ອຍອາຍຸ 10 ປີ ແລະ ມີຜູ້ໄດ້ຮັບບາດເຈັບຖືກນໍາຕົວສົ່ງໄປທີ່ໂຮງໝໍຢ່າງໜ້ອຍ 17 ຄົນ, ໃນຈໍານວນນີ້ ມີ 11 ຄົນ ແມ່ນໝົດສະຕິຈາກອາການຫົວໃຈວາຍ. ຍ້ອນ​ເຫດ​ນັ້ນ, ງານເທດສະການ​ດົນຕີດັ່ງກ່າວ ​ທີ່​ດຳ​ເນີນ​ເປັນ​ເວລາ 2 ມື້ ແລະ ​​ມີ​ຜູ້​ເຂົ້າ​ຊົມ 50.000 ກວ່າ​ຄົນ​ຕ້ອງ​ຖືກ​ຍົກ​ເລີກໄປ.

ເຈົ້າໜ້າທີ່ດັບເພີງ ກ່າວວ່າ ເຫດ​ການ​ດັ່ງ​ກ່າວ​ໄດ້​ເກີດ​ຂຶ້ນ​ໃນ​ເວ​ລາ 21:00, ເປັນຊ່ວງທີ່​ນັກ​ຮ້ອງ​ເພງແຣັບຊື່ດັງ Travis Scott ກໍາລັງຂຶ້ນສະແດງຢູ່ເທິງເວທີ ​ເຮັດ​ໃຫ້​ຜູ້​ຄົນ​ຈາກ​ດ້ານຫຼັງ​ເຄື່ອນ​ຍ້າຍໄປ​ສູ່ໃກ້ໜ້າ​ເວທີ ​ນໍາໄປສູ່ການເກີດເຫດ​ໂສກ​ເສົ້າຂຶ້ນ​ທີ່​ສວນສາທາລະນະ NRG ເຊິ່ງໃຊ້ເປັນສະຖານທີ່ຈັດງານ.

ຜູ້ບັນຊາການຕຳຫຼວດ Houston ທີ່ມີຊື່ວ່າ Troy Finner ຖະ​ແຫຼ​ງການ ​ໄດ້​ຮຽກຮ້ອງ​ໃຫ້​ປະຊາຊົນ​ຢູ່​ໃນ​ຄວາມ​ສະຫງົບ ​ແລະ ຢ່າຟ້າວສະຫຼຸບເນຶ້ອໃນຕໍ່ກັບເຫດການດັ່ງກ່າວ ທີ່ຈະເຮັດໃຫ້ຄົນອື່ນໆ ເກີດການຕື່ນຕົກໃຈ.