ສະຖາບັນການແພດ ແລະ ການຢາພື້ນເມືອງ, ກະຊວງສາທາລະນະສຸກ ຮ່ວມກັບບໍລິສັດ ຄອລທີວາ ຈຳກັດ ເຊັນສັນຍາຮ່ວມມືສ້າງອາຄານທົດລອງເພື່ອສຶກສາ, ຄົ້ນຄວ້າ, ວິໄຈ ແລະ ຢັ້ງຢືນຄຸນນະພາບພືດເປັນຢາຂອງລາວ ແລະ ພືດປໍແກ້ວ.
ພິທີເຊັນສັນຍາຮ່ວມມືດັ່ງກ່າວຈັດຂຶ້ນໃນວັນທີ 1 ພະຈິກ ຜ່ານມາ ທີ່ນະຄອນຫຼວງວຽງຈັນ, ຮ່ວມລົງນາມລະຫວ່າງ ທ່ານ ບຸນເລື່ອນ ດວງເດືອນ, ຫົວໜ້າສະຖາບັນການແພດ ແລະການຢາພື້ນເມືອງ ແລະ ທ່ານ ພອນສະຫວັນ ຟາມ, ປະທານບໍລິສັດ ຄອລທີວາ ຈຳກັດ, ມີທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ພ້ອມດ້ວຍການນຳຂັ້ນສູງ ແລະພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ບຸນເລື່ອນ ດວງເດືອນ ກ່າວວ່າ: ການມີຫ້ອງທົດລອງທີ່ມີມາດຕະຖານຮັບຮອງຈາກສາກົນ ໂດຍສະເພາະກໍແມ່ນການຢັ້ງຢືນ ISO 17025 ແມ່ນຄວາມຫວັງຂອງກະຊວງສາທາລະນະສຸກ ເພື່ອໃຊ້ໃນວຽກງານຢັ້ງຢືນມາດຕະຖານຢາພື້ນເມືອງລາວ ເພື່ອຊ່ວຍທົດແທນການນຳເຂົ້າຢາຈາກຕ່າງປະເທດ, ທັງສາມາດຄົ້ນຄວ້າວິໄຈ ແລະເພື່ອປົກປ້ອງຜູ້ບໍລິໂພກ, ຊອກຮູ້ໄດ້ສານຕົກຄ້າງ, ສານເຄມີ, ຢາປາບສັດຕູພືດ ແລະອື່ນໆທີ່ສົ່ງຜົນກະທົບຕໍ່ສຸຂະພາບ.
ທ່ານກ່າວຕື່ມວ່າ: ບໍລິສັດ ຄອລທີວາ ເປັນຜູ້ລົງທຶນຝ່າຍດຽວໃສ່ຕຶກວິໄຈ 3 ຊັ້ນ ລວມທັງອຸປະກອນ, ເຄມີວິໄຈ, ເຄື່ອງວິໄຈ ແລະອື່ນໆ ຕະຫຼອດເຖິງຄ່າໃຊ້ຈ່າຍຕ່າງໆ ເຊັ່ນ ການບໍລິຫານໂຄງການຝຶກອົບຮົມ, ສ້າງວິຊາການນັກຄົ້ນຄວ້າໃຫ້ສະຖາບັນຈົນສາມາດວິໄຈໄດ້ຢ່າງສົມບູນ ຫຼື ຈົນກວ່າຈະສິ້ນສຸດໂຄງການໄລຍະ 20 ປີ ຂະນະທີ່ສະຖາບັນ ແມ່ນເປັນຜູ້ຕາງໜ້າພາກລັດ ໃນການປະກອບສ່ວນດ້ານສະຖານທີ່ ແລະຈັດຕັ້ງບຸກຄະລາກອນໃນການເຮັດວຽກຮ່ວມກັນໃຫ້ມີປະສິດທິຜົນ.
ຂໍ້ມູນຈາກ: ໜັງສືພິມ Vientiane Times