ເຟສບຸກປະກາດ ຈະປິດລະບົບຈົດຈໍາໃບຫນ້າທີ່ໃຊ້ໃນສື່ສັງຄົມອອນລາຍພາຍໃນເດືອນທັນວາ ປີ 2021 ນີ້ ເຊິ່ງຈະສົ່ງຜົນກະທົບຕໍ່ຜູ້ໃຊ້ Facebook ຫຼາຍກວ່າ 1 ຕື້ຄົນ ທ່າມກາງຄວາມກັງວົນທາງສັງຄົມກ່ຽວກັບເຕັກໂນໂລຢີ. ຕາມຂ່າວ Reuters
ຮອງປະທານຝ່າຍລະບົບປັນຍາປະດິດໃນເຟສບຸກ Jerome Pacenti ໄດ້ກ່າວໃນ blog post ໃນວັນທີ 2 ພະຈິກ ໂດຍມີເນື້ອໃນວ່າ ໃນຊ່ວງທີ່ໜ່ວຍງານກໍາກັບດູແລ ຍັງຢູ່ໃນຂະບວນການສ້າງກົດລະບຽບທີ່ຊັດເຈນກ່ຽວກັບການນໍາໃຊ້ງານ ແລະ ດ້ວຍສະຖານະການທີ່ບໍ່ແນ່ນອນໃນໄລຍະນີ້ ເຟສບຸກເຊື່ອວ່າ ການຈໍາກັດການນໍາໃຊ້ການຮັບຮູ້ໃບຫນ້າແມ່ນມາດຕະການທີ່ເໝາະສົມ.
ເຟສບຸກລະບຸວ່າ ມາດຕະການດັ່ງກ່າວ ມີຈຸດປະສົງເພື່ອປິດຮູບແບບການຮັບຮູ້ໃບຫນ້າສໍາລັບບັນຊີຜູ້ໃຊ້ຫຼາຍກວ່າ 1 ຕື້ບັນຊີ ເຊິ່ງກວມເອົາປະມານໜຶ່ງສ່ວນສາມຂອງຜູ້ໃຊ້ Facebook ແລະ ບໍລິສັດຄາດວ່າ ຈະສໍາເລັດການໂຍກຍ້າຍຂອງລະບົບໃນເດືອນທັນວາປີນີ້.
ຢ່າງໃດກໍຕາມ, ເຟສບຸກເມື່ອບໍ່ດົນມານີ້ ໄດ້ປະກາດປ່ຽນຊື່ໃໝ່ເປັນ Meta ໃນອາທິດທີ່ຜ່ານມາ ແລະ ຍັງບໍ່ໄດ້ປິດໂອກາດສໍາລັບການຮັບຮູ້ໃບຫນ້າຢ່າງຖາວອນ ໂດຍທາງບໍລິສັດຍັງເຫັນວ່າ ເປັນເຄື່ອງມືທີ່ມີປະສິດທິພາບສໍາລັບຜູ້ທີ່ຕ້ອງການຢັ້ງຢືນຕົວຕົນຂອງເຂົາເຈົ້າ ຫຼື ຜູ້ທີ່ຕ້ອງການປ້ອງກັນການສໍ້ໂກງ ແລະ ການປອມຕົວອອນລາຍ ບໍລິສັດຈະສືບຕໍ່ພັດທະນາເຕັກໂນໂລຊີນີ້ຕໍ່ໄປ.