ອີງຕາມຂໍ້ມູນຈາກໜັງສືພິມ Vientiane Times: ລັດຖະບານຄາດຄະເນຈະມີລາຍໄດ້ເຖິງ 2.000 ຕື້ກີບຈາກການຂຸດບິດຄອຍ ໃນປີ 2022 ເຊິ່ງຖືເປັນລາຍຮັບຂອງປະເທດຄັ້ງທຳອິດທີ່ຈະໄດ້ຈາກການຂຸດ ແລະຊື້ຂາຍສະກຸນເງິນດິຈີຕອລ.

ທ່ານ ບຸນໂຈມ ອຸບົນປະເສີດ, ລັດຖະມົນຕີກະຊວງການເງິນ ໄດ້ລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2021 ແລະແຜນການປະຈຳປີ 2022 ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 1 ພະຈິກຜ່ານມາ ວ່າ: ແຫຼ່ງລາຍໄດ້ໃໝ່ນີ້ຈະມີສ່ວນສະໜັບສະໜູນໃນການເພີ່ມລາຍຮັບຂອງປະເທດທີ່ຕັ້ງເປົ້າໄວ້ໃນປີ 2022 ຂຶ້ນເຖິງ 20% ຫຼື ເທົ່າກັບ 3.754 ຕື້ກີບ ທຽບໃສ່ເປົ້າໝາຍປີ 2021 ເຊິ່ງເຊື່ອວ່າ ລາຍໄດ້ຈາກການຂຸດບິດຄອຍທີ່ຄາດວ່າຈະເຖິງ 2.000 ຕື້ກີບນັ້ນ ຈະຊ່ວຍໃຫ້ລັດຖະບານສາມາດຈ່າຍເງິນສຳລັບໂຄງການສຳຄັນຕ່າງໆ ລວມເຖິງການເພີ່ມເງິນສະໜັບສະໜູນໃຫ້ແກ່ພະນັກງານ, ລວມທັງຄ່າໃຊ້ຈ່າຍໃນວຽກງານຕອບໂຕ້ການແຜ່ລະບາດຂອງພະຍາດໂຄວິດ-19 ແລະການຊຳລະໜີ້.

ລາຍໄດ້ທີ່ຄາດວ່າຈະໄດ້ຮັບຈາກສະກຸນເງິນດິຈິຕອລດັ່ງກ່າວ ສືບເນື່ອງມາຈາກພາຍຫຼັງທີ່ລັດຖະບານໄດ້ອະນຸຍາດບໍລິສັດ 6 ແຫ່ງດຳເນີນການທົດລອງຂຸດ ແລະຊື້ຂາຍສະກຸນເງິນດິຈິຕອລລວມທັງບິດຄອຍໃນລາວ ໃນຊ່ວງເດືອນກັນຍາຜ່ານມາ.