ຈາກການຖະແຫຼງຂ່າວທີ່ຜ່ານມາ ທ່ານ ດຣ. ບົວຜັນ ຄຳພາພົງຜ່ານ ຮອງຫົວໜ້າສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກ ໄດ້ເວົ້າເຖິງສາເຫດສ່ວນໃຫຍ່ທີ່ເຮັດໃຫ້ຜູ້ຕິດເຊື້ອໂຄວິດ-19 ເສຍຊີວິດດັ່ງນີ້:
ສະພາບການລະບາດ ໃນສປປ ລາວ ຂອງພວກເຮົາ ຍັງຄົງໜ້າເປັນຫ່ວງ ໂດຍສະເພາະ ການລະບາດພາຍໃນ ຢູ່ນະຄອນຫຼວງວຽງຈັນ ທີ່ຍັງສືບຕໍ່ມີທ່າອ່ຽງເພິ່ມຂຶ້ນໃນແຕ່ລະວັນ ຢູ່ໃນຫຼາຍບ້ານ, ຫຼາຍເມືອງ ແລະ ຫຼາກຫຼາຍອາຊີບ ເຊິ່ງເຫັນໄດ້ຈາກ ມີລາຍງານຕົວເລກຜູ້ຕິດເຊື້ອຫຼາຍຮ້ອຍຄົນພາຍໃນມື້ດຽວ ຄຽງຄູ່ກັນນັ້ນການຕິດເຊື້ອພາຍໃນຊຸມຊົນທີ່ເພີ່ມຂື້ນໃນແຕ່ລະວັນ ຈຳນວນຜູ້ເສຍຊີວິດຈາກພະຍາດໂຄວິດ-19 ກໍ່ເພີ່ມຂື້ນສູງແບບກ້າວກະໂດດ ເຊັ່ນດຽວກັນ ເຫັນໄດ້ຈາກ ໃນຕົ້ນເດືອນຕຸລາ ມີຈຳນວນຜູ້ເສຍຊີວິດສະສົມ ຈາກພະຍາດດັ່ງກ່າວ 20 ຄົນ ມາຮອດວັນທີ 28 ຕຸລາ ຈຳນວນຜູ້ເສຍຊີວິດສະສົມ ແມ່ນ 59 ຄົນ.
ສາເຫດທີ່ຄົນເຈັບຕິດເຊື້ອ ແລ້ວກ້າວສູ່ຂັ້ນວິກິດ ແລະ ເສຍຊີວິດ ສ່ວນໜື່ງ ກໍ່ແມ່ນມີພະຍາດປະຈໍາຕົວ, ເປັນກຸ່ມຜູ້ສູງອາຍຸ ທີ່ສ່ວນໃຫຍ່ບໍ່ໄດ້ຮັບການສັກວັກຊິນ ແລະ ບາງຄົນຕິດເຊື້ອມາໄດ້ໄລຍະໜື່ງແລ້ວ ຈຶ່ງເຂົ້າມາປິ່ນປົວ. ການມາປິ່ນປົວທີ່ໂຮງໝໍຊ້າ ສົ່ງຜົນໃຫ້ອາການຜູ້ກ່ຽວພັດທະນາສູ່ຂັ້ນວິກິດຢ່າງໄວວາຈົນເຖິງຂັ້ນເສຍຊີວິດໄດ້. ສະນັ້ນ ຖ້າມີຄົນຕິດເຊື້ອໃນຊຸມຊົນຫຼາຍ ແລະ ລາມເປັນວົງກວ້າງໃນຫຼາຍບ້ານ ຈະເປັນຄວາມສ່ຽງແກ່ຜູ້ທີ່ມີພະຍາດປະຈໍາຕົວ ແລະ ຜູ້ສູງອາຍຸທີ່ສຸດ. ດັ່ງນັ້ນ, ຫາກທ່ານນອນຢູ່ໃນກຸ່ມສ່ຽງ ຫຼື ມີອາການ ຄວນຮີບຮ້ອນພົບແພດ ເພື່ອເກັບຕົວຢ່າງກວດ ເພື່ອສະກັດກັ້ນບໍ່ໃຫ້ອາການເຂົ້າຂັ້ນວິກິດ.