ວັນທີ 27 ຕຸລາ 2021 ເຈົ້າໜ້າທີ່ ປກສ ແຂວງບໍ່ແກ້ວ ສົມທົບກັບພາກສ່ວນທີ່ກ່ຽວຂ້ອງ ກວດຄົ້ນລົດ 12 ລໍ້ ບັນທຸກລັງເບຍ ພົບເຫັນຢາເສບຕິດ ປະເພດ ຢາບ້າ ຈຳນວນ 262 ເປົ່າ, ມີ 27.832 ມັດ ເທົ່າກັບ 55.664.000 ເມັດ, ນ້ຳໜັກ 5.566 ກິໂລກຼາມ, ຢາໄອສ໌ ຈໍານວນ 65 ເປົ່າ ມີ1.537 ຖົງ, ນໍ້າ ໜັກ 1.537 ກິໂລກຼາມ.
ເຈົ້າໜ້າທີ່ໄດ້ກັກຕົວ ທ້າວ ທອງໄຊທໍ ອາຍຸ 22 ປີ, ຜູ້ຂັບລົດຄັນດັ່ງກ່າວ ຢູ່ບ້ານນໍ້າສະໝອກເໜືອ ເມືອງຫ້ວຍຊາຍ ແຂວງບໍ່ແກ້ວ, ຜູ້ກ່ຽວໄດ້ໃຫ້ການວ່າ ເຄື່ອງດັ່ງກ່າວແມ່ນ ຂອງທ້າວ ໄຊຕົງທໍ່ ອາຍຸ 40 ປີ, ນັກທຸລະກິດ ຢູ່ບ້ານຫ້ວຍຊາຍນ້ອຍ ເມືອງຫ້ວຍຊາຍ ແຂວງບໍ່ແກ້ວ.
ຈາກນັ້ນ, ເຈົ້າໜ້າທີ່ ປກສ ໄດ້ສົມທົບກັບພາກ ສ່ວນທີ່ກ່ຽວຂ້ອງ ຕິດຕາມຈັບຕົວ ທ້າວ ໄຊຕົງທໍ່ ແລະ ກວດຄົ້ນເຮືອນ ພົບເຫັນຢາເສບຕິດ ປະເພດຢາບ້າ 4 ຖົງໃຫຍ່ ນໍ້າໜັກ 45,5 ກິໂລ, ແປ້ງຝຸ່ນສີແດງ ຈໍານວນ 21 ຖົງໃຫຍ່, ນໍ້າໜັກ 159 ກິໂລ, ແປ້ງຝຸ່ນສີຂາວ 20 ກິໂລ, ແປ້ງຝຸ່ນສີຟ້າ 2 ຖົງນ້ອຍ ຈຳນວນ 300 ກຼາມ, ນໍ້າຢາເຄມີ 1 ຕຸກໃຫຍ່ ແລະ 3 ຕຸກນ້ອຍ, ນໍ້າໜັກ 10 ກິໂລ, ຢາບ້າເມັດສີຂຽວ 2 ຖົງໃຫຍ່ ນໍ້າໜັກ 2 ກິໂລ, ຢາບ້າເມັດ ສີຂາວ ຈໍານວນ 1 ຖົງນ້ອຍ ນໍ້າໜັກ 200 ກິໂລ, ເຄື່ອງອັດຢາ ເສບຕິດ 1 ເຄື່ອງ ແລະ ປືນ Ak ພ້ອມລູກ. ນອກນັ້ນ, ໃນຕູ້ເຊັບຍັງພົບເງິນ ແລະ ວັດຖຸ ຄ້າຍຄືຄຳຈຳນວນໜຶ່ງ ຈຶ່ງຢຶດໄວ້ ເພື່ອກວດສອບ.
ແຫຼ່ງຂ່າວ: ຄວາມສະຫງົບ Lao Security News