ທ່ານ ພົນເອກ ປະຍຸດ ຈັນໂອຊາ ນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດ ຂອງປະເທດໄທໄດ້ເຂົ້າຮ່ວມ ແລະ ກ່າວຄໍາຖະແຫຼງໃນກອງປະຊຸມສຸດຍອດອາຊຽນ ຄັ້ງທີ 38 ທີ່ຜ່ານມາ ຜ່ານລະບົບທາງໄກ ພ້ອມກັບຜູ້ນໍາສະມາຊິກອາຊຽນ. ທ່ານ ປະຍຸດ ຈັນໂອຊາ ໄດ້ກ່າວບົດຖະແຫຼງໃນການປະຊຸມກ່ຽວກັບການຕໍ່ສູ້ກັບພະຍາດໂຄວິດ-19 ເພື່ອຮ່ວມມືກັນແກ້ໄຂການລະບາດ ແລະ ຜົນກະທົບຂອງໂຄວິດ-19 ແລະ ຄວນຖອດຖອນເອົາບົດຮຽນຈາກໂຄວິດ-19 ມານໍາໃຊ້ເພື່ອສ້າງຄວາມເຂັ້ມແຂງໃຫ້ປະຊາຄົມອາຊຽນ ພ້ອມກັບຮັບມືຄວາມທ້າທາຍໃໝ່ໆໃນອະນາຄົດ ເຊິ່ງທ່ານນາຍົກຂອງປະເທດໄທໄດ້ສະເໜີປະເດັນທີ່ອາຊຽນຄວນໃຫ້ຄວາມສໍາຄັນ 3 ປະການຄື:
- ຕ້ອງດໍາເນີນຕາມຂໍ້ກໍານົດໃນຂອບເຂດຂອງອາຊຽນເພື່ອແກ້ໄຂບັນຫາໂຄວິດ-19 ໃຫ້ມີປະສິດທິພາບ ແລະ ຮູ້ສຶກຍິນດີທີ່ມີກອງທຶນອາຊຽນໃນການຈັດຊື້ວັກຊີນໂຄວິດ-19 ແລະ ຫວັງວ່າປະເທດສະມາຊິກຈະໄດ້ຮັບວັກຊີນຢ່າງທົ່ວເຖິງ ແລະ ວ່ອງໄວ. ທັງນີ້, ປະເທດໄທເອງໄດ້ແຈ້ງລາຍການສິ່ງຂອງທີ່ບໍລິຈາກໃຫ້ແກ່ຄັງສໍາຮອງອຸປະກອນທາງການແພດໃຫ້ກັບປະເທດອາຊຽນ ແລະ ຫວັງວ່າຈະເປັນປະໂຫຍດໃນຕໍ່ໜ້າ
- ຄວນເປີດປະເທດ ແລະ ສົ່ງເສີມການເດີນທາງໄປມາຫາສູ່ກັນຢ່າງປອດໄພ ໃຊ້ປະໂຫຍດຈາກຂອບເຂດການຈັດຕັ້ງລະບຽບການເດີນທາງຂອງອາຊຽນ ແລະ ຄວນດໍາເນີນແນວທາງການຮອງຮັບວັກຊີນລະຫວ່າງກັນ ເພື່ອຄວາມສະດວກໃນການເດີນທາງ ເຊິ່ງທີ່ຜ່ານມາປະເທດໄທໄດ້ເປີດພື້ນທີ່ຕ້ອນຮັບນັກທ່ອງທ່ຽວມາແລ້ວ ແລະ ຈະເລີ່ມເປີດປະເທດຢ່າງເປັນຂັ້ນຕອນນັບຕັ້ງແຕ່ວັນທີ 1 ພະຈິກ 2021 ເປັນຕົ້ນໄປ
- ໂຄວິດ-19 ຕະຫຼອດຮອດໄພທໍາມະຊາດຕ່າງໆ ບໍ່ວ່າຈະເປັນການປ່ຽນແປງທາງດ້ານພູມອາກາດ, ອຸທົກກະໄພ, ໄຟໄໝ້ປ່າ ແລະ ໝອກຄວັນຂ້າມເຂດແດນ ທີ່ສະທ້ອນໃຫ້ເຫັນຈຸດອ່ອນຂອງແນວທາງການພັດທະນາໃນປັດຈຸບັນທີ່ເນັ້ນສະເພາະຜົນປະໂຫຍດທາງດ້ານເສດຖະກິດເປັນຫຼັກ ໂດຍປ່ອຍປະລະເລີຍຜົນກະທົບຕໍ່ກັບສິ່ງແວດລ້ອມ ແລະ ຊັບພະຍາກອນທໍາມະຊາດ ອັນເປັນທີ່ມາຂອງວິກິດຕ່າງໆທີ່ຮຸນແຮງ. ດັ່ງນັ້ນ, ເຖິງເວລາທີ່ຈະຕ້ອງປັບປ່ຽນຂະບວນການໃນການໃຊ້ຊີວິດໃນທຸກດ້ານ ເພື່ອສ້າງຄວາມສົມດຸນ ເຮັດໃຫ້ການຟື້ນຟູ ແລະ ພັດທະນາອາຊຽນເປັນໄປຢ່າງຍືນຍົງ ເຊິ່ງສອດຄ່ອງກັບໂມເດລທຸລະກິດ BCG ທີ່ປະເທດໄທດໍາເນີນການຢູ່
ແຫຼ່ງຂ່າວ: bangkokbiznews