ກະຊວງການຕ່າງປະເທດຂອງຫວຽດນາມໄດ້ມີການຕົກລົງຍອມຮັບໜັງສືເດີນທາງວັກຊີນໂຄວິດ-19 ຈາກ 72 ປະເທດ ແລະ ເຂດປົກຄອງພິເສດ ແລະ ກໍາລັງປຶກສາຫາລືກັບອີກ 80 ປະເທດ.
ທ່ານ ເລ ທິ ທູ ຫັງ ໂຄສົກຂອງກະຊວງການຕ່າງປະເທດຂອງຫວຽດນາມກ່າວໃນການຖະແຫຼງຂ່າວເພື່ອຕອບຄໍາຖາມກ່ຽວກັບນະໂຍບາຍຂອງຫວຽດນາມໃນການໃຫ້ຊາວຕ່າງປະເທດທີ່ໄດ້ຮັບວັກຊີນຄົບຖ້ວນເຂົ້າປະເທດວ່າ: “ປັດຈຸບັນຫວຽດນາມຍອມຮັບໃບຮັບຮອງການສັກວັກຊີນຊົ່ວຄາວ ຫຼື ທີ່ເອີ້ນວ່າ ໜັງສືເດີນທາງວັກຊີນຈາກ 72 ປະເທດ ແລະ ເຂດປົກຄອງພິເສດຕາມທີ່ກະຊວງການຕ່າງປະເທດໄດ້ຮັບການສະເໜີຈາກສໍານັກງານຜູ້ແທນ”
ນອກຈາກນັ້ນ, ທ່ານຍັງໄດ້ກ່າວຕໍ່ອີກວ່າ: “ກະຊວງກໍາລັງມີການປຶກສາຫາລືກັບບັນດາພັນທະມິດອີກປະມານ 80 ປະເທດ ກ່ຽວກັບການຍອມຮັບໜັງສືເດີນທາງວັກຊີນຂອງກັນ ແລະ ກັນ, ໃບຮັບຮອງການສັກວັກຊີນຂອງຫວຽດນາມຍັງໄດ້ຮັບການຍອມຮັບຈາກບາງປະເທດ ແລະ ສາມາດໃຊ້ເພື່ອເຂົ້າສູ່ປະເທດເຫຼົ່ານັ້ນໄດ້”
ໃນເດືອນກັນຍາທີ່ຜ່ານມາ, ສະໜາມບິນ ວານ ດອນ ຂອງແຂວງ ກວາງນິນ ໄດ້ຕ້ອນຮັບຖ້ຽວບິນຫຼາຍຖ້ຽວບິນທີ່ມີຜູ້ຖືໜັງສືເດີນທາງວັກຊີນໃນຊ່ວງທົດລອງ ເຊິ່ງຊ່ວຍເຮັດໃຫ້ປະຊາຊົນຫວຽດນາມທີ່ຢູ່ອາເມລິກາ, ຝຣັ່ງ ແລະ ຍີ່ປຸ່ນເດີນທາງກັບປະເທດໄດ້ ໂດຍຜູ້ໂດຍສາຍທຸກຄົນແມ່ນໄດ້ຮັບວັກຊີນຄົບ, ມີສຸຂະພາບດີ ແລະ ມີຜົນກວດໂຄວິດ-19 ເປັນລົບ ຈາກການກວດຫາເຊື້ອພາຍໃນ 72 ຊົ່ວໂມງກ່ອນທີ່ຈະກັບປະເທດ ແລະ ຜູ້ທີ່ມີໜັງສືເດີນທາງວັກຊີນກໍຍັງໄດ້ກັກໂຕໃນສູນກັກບໍລິເວນເປັນເວລາ 7 ມື້.
ແຫຼ່ງຂ່າວ: thaipublica