ສະຫະລັດອາເມລິກາກຽມເປີດປະເທດຕົ້ນເດືອນພະຈິກທີ່ຈະມາເຖິງ ເພື່ອເປີດໂອກາດໃຫ້ນັກທ່ອງທ່ຽວຕ່າງປະເທດຜູ້ທີ່ສັກວັກຊີນຄົບສອງເຂັມສາມາດເດີນທາງເຂົ້າສະຫະລັດໄດ້ ຂະນະທີ່ພາກການທ່ອງທ່ຽວ ລວມທັງສາຍການບິນ ແລະພາກທຸລະກິດຕ່າງກໍເຫັນດີກັບແຜນການນີ້.
ການເປີດປະເທດຈະມີຂຶ້ນໃນວັນທີ 8 ພະຈິກ 2021 ເຊິ່ງຈະເປັນການເປີດຊາຍແດນ ຜ່ານທາງພື້ນດິນ ແລະທາງອາກາດ ຂະນະທີ່ຜູ້ຈະເດີນທາງເຂົ້າສະຫະລັດຕ້ອງໄດ້ຮັບວັກຊີນຄົບຖ້ວນໂດຍເປັນວັກຊີນທີ່ຜ່ານການຮັບຮອງຈາກອົງການອາຫານ ແລະຢາ ສະຫະລັດ ລວມທັງອົງການອະນາໄມໂລກ ເຊັ່ນ ວັກຊີນແອສຕາເຊເນກາ, ຈອນສັນແອນຈອນສັນ, ໂມເດີນາ, ໄຟເຊີ, ຊີໂນຟາມ ແລະຊີໂນແວັກ ພ້ອມມີໃບຢັ້ງຢືນກວດໂຄວິດພາຍໃນ 3 ວັນກ່ອນອອກເດີນທາງ ສ່ວນສາຍການບິນຈະຕ້ອງມີມາດຕະການສອບສວນຢ່າງເຄັ່ງຄັດ.
ເຖິງແມ່ນລັດຖະບານສະຫະລັດກຽມເດີນໜ້າເປີດປະເທດ ແຕ່ຕົວເລກຜູ້ຕິດເຊື້ອໂຄໂຣນ່າໄວຣັສສະເລ່ຍຍັງຢູ່ທີ່ 85,000 ຄົນຕໍ່ວັນ ແຕ່ກໍຫຼຸດລົງເຖິງ 8,000 ລາຍເມື່ອທຽບໃສ່ອາທິດກ່ອນ. ຢ່າງໃດກໍຕາມ, ຍັງບໍ່ສາມາດຢືນຢັນໄດ້ວ່າພະຍາດໂຄວິດ-19 ຈະກັບມາແຜ່ລະບາດຄືນໃໝ່ອີກຄັ້ງພາຍຫຼັງເປີດປະເທດ ຫຼື ບໍ່.
ຂໍ້ມູນຈາກ: ໄທຣັດອອນໄລນ໌