ໃນວັນທີ 14 ຕຸລາ 2021, ນັກຮຽນມັດທະຍົມຕອນປາຍຂອງລາວ 11 ຄົນ ໄດ້ ເດີນທາງໄປຍີ່ປຸ່ນ ເພື່ອຮຽນຢູ່ທີ່ວັດທະຍົມຕອນປາຍຍີ່ປຸ່ນ ພາຍໃຕ້ ໂຄງການອາຊີ-ຄາເກ ຮາຊິ (“ຄາເກຮາຊິ” ແມ່ນຄໍາສັບພາສາຍີ່ປຸ່ນທີ່ຫມາຍເຖິງ “ຂົວ”) ທີ່ໄດ້ຮັບການສະຫນັບສະໜຸນໂດຍລັດຖະບານຍີ່ປຸ່ນ. ພວກເຂົາເຕັມໄປດ້ວຍຄວາມຫວັງວ່າຈະສາມາດເດີນທາງໄປຍີ່ປຸ່ນໄດ້ໃນຊ່ວງການລະບາດຂອງເຊື້ອພະຍາດໂຄວິດ-19. ນັກຮຽນເຫຼົ່ານີ້ຈະໄດ້ອາໄສຢູ່ກັບຄອບຄົວຄົນຍີ່ປຸ່ນຈົນເຖິງເດືອນມີນາ 2022.
ນັກຮຽນທັງ 11 ຄົນນີ້ ມີ 9 ຄົນທີ່ມາຈາກນະຄອນຫຼວງວຽງຈັນ ແລະ ອີກ 2 ຄົນ ມາຈາກແຂວງຫຼວງພະບາງ ນັກຮຽນທັງໝົດນີ້ແມ່ນໄດ້ຖືກຄັດເລືອກໂດຍອີງຕາມຜົນສໍາເລັດໃນການຮຽນຂອງພວກເຂົາ, ຄວາມສົນໃຈໃນພາສາ ແລະ ວັດທະນະ ທໍາຍີ່ປຸ່ນ ແລະ ທ່າແຮງທີ່ຈະກາຍເປັນຜູ້ນໍາໃນອະນາຄົດ.
ໃນເດືອນກຸມພາ, ການສໍາພາດທາງອອນລາຍ ໄດ້ຖືກຈັດຂຶ້ນເປັນຄັ້ງທໍາອິດທ່າມກາງການແຜ່ລະບາດຂອງພະຍາດໃນທົ່ວໂລກ ໂດຍການຮ່ວມມືກັບກະຊວງສຶກສາທິການ ແລະ ກິລາ ຂອງ ສປປ ລາວ, ສະຖານເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ມູນນິທິການສຶກສາ ແລະ ວັດທະນະທໍາໄທ-ນາໆຊາດ (AFS Intercultural Programs Thailand).
ນັກຮຽນທີ່ໄດ້ເຂົ້າຮ່ວມໂຄງການຄາເກຮາຊິເຫຼົ່ານີ້ ໄດ້ເປັນຄວາມຫວັງໃນການສື່ສານກັບຄົນຍີ່ປຸ່ນ ເພື່ອລົງເລິກເຖິງຄວາມເຊື່ອຫມັ້ນ ແລະ ຄວາມເຂົ້າໃຈຂອງທັງສອງຝ່າຍ ລວມທັງເພື່ອສ້າງພື້ນຖານໃຫ້ກັບມິດຕະພາບ ແລະ ການຮ່ວມມືໃນອະນາຄົດ ລະຫວ່າງສອງປະເທດ. ສະຖານເອກອັກຄະຣາຊະທູດຍີ່ປຸ່ນກໍຫວັງຢ່າງຈິງໃຈວ່າພວກເຂົາຈະໃຊ້ຊີວິດຢູ່ທີ່ປະເທດຍີ່ປຸ່ນໃນແຕ່ລະມື້ຢ່າງມີຄ່າ ແລະ ມ່ວນຊື່ນໄປກັບສິ່ງທ້າທາຍໃໝ່ໆ ທີ່ພວກເຂົາພົບຢູ່ທີ່ຍີ່ປຸ່ນ.
ໂຄງການອາຊີ-ຄາເກຮາຊິນ ເປັນໂຄງການລິເລີ່ມ ເຊິ່ງປະກາດໂດຍ ນາຍົກລັດຖະມົນຕີຍີ່ປຸ່ນ ຊິນໂຊ ອາເບະ ໃນປີ 2017, ມີຈຸດປະສົງເພື່ອເສີມສ້າງຄວາມ ເຂັ້ມແຂງຂອງສາຍພົວພັນລະຫວ່າງຍີ່ປຸ່ນ ແລະ ປະເທດອື່ນໆທົ່ວພາກພື້ນອາຊີ. ໂຄງການດັ່ງກ່າວສະຫນອງທຶນການສຶກສາເຕັມ ໃຫ້ກັບນັກຮຽນມັດທະຍົມຕອນປາຍໃນອາຊີ ເພື່ອຮຽນ ແລະ ໃຊ້ຊີວິດຢູ່ທີ່ປະເທດຍີ່ປຸ່ນ, ນັກຮຽນຮຸ້ນທໍາອິດ 100 ຄົນຈາກ ທົ່ວພາກພື້ນອາຊີ ໄດ້ເດີນທາງໄປຮອດຍີ່ປຸ່ນໃນເດືອນສິງຫາ ປີ 2018 ແລະ ປະຈຸບັນນີ້ ໂຄງການໄດ້ຖືກຂະຫຍາຍອອກ ດ້ວຍນັກຮຽນທັງໝົດ 235 ຄົນທີ່ເຂົ້າຮ່ວມໃນປີນີ້.