ການລະບາດຂອງພະຍາດໂຄວິດ-19 ຢູ່ພາຍໃນນະຄອນຫຼວງວຽງຈັນເປັນການລະບາດໃຫຍ່ ແລະ ໄດ້ມີການຂະຫຍາຍອອກໄປເປັນວົງກວ້າງ. ໃນປັດຈຸບັນມີການປະກາດໃຫ້ເປັນບ້ານແດງຈໍານວນຫຼາຍ ແລະ ຈໍານວນຜູ້ຕິດເຊື້ອຢູ່ໃນລະດັບ 100-200 ຄົນຕໍ່ມື້ ເຊິ່ງມັນສະແດງໃຫ້ເຫັນວ່າຍັງມີການລະບາດຢູ່ໃນລະດັບສູງ.

ຕໍ່ກັບສະພາບການດັ່ງກ່າວຄະນະສະເພາະກິດຂັ້ນນະຄອນຫຼວງວຽງຈັນຈຶ່ງໄດ້ມີມາດຕະການໃຊ້ຄໍາສັ່ງເລກທີ 016/ລົງວັນທີ 19 ກັນຍາ ມາຜັນຂະຫຍາຍເປັນແຈ້ງການຂອງເຈົ້າຄອງນະຄອນຫຼວງວຽງຈັນ. ໜຶ່ງໃນມາດຕະການສະກັດກັ້ນນັ້ນແມ່ນການຕັ້ງດ່ານກວດກາຕາມຈຸດຕ່າງໆພາຍໃນນະຄອນຫຼວງວຽງຈັນຂອງເຈົ້າໜ້າທີ່ຕໍາຫຼວດຈາລະຈອນຮ່ວມກັບພາກສ່ວນທີ່ກ່ຽວຂ້ອງເພື່ອຈໍາກັດການເດີນທາງຂອງປະຊາຊົນພາຍໃນຕົວເມືອງຖ້າບໍ່ມີວຽກອັນຈໍາເປັນ

ແຕ່ພາຍຫຼັງການຈັດຕັ້ງປະຕິບັດມາໄດ້ໄລຍະໜຶ່ງເຫັນໄດ້ວ່າການຕັ້ງດ່ານກວດກາຕາມທ້ອງຖະໜົນຍັງບໍ່ມີປະສິດທິຜົນໄດ້ດີເທົ່າທີ່ຄວນ ເພາະນະຄອນຫຼວງວຽງຈັນຍັງຮັກສາຄວາມສົມດຸນລະຫວ່າງມາດຕະການປ້ອງກັນການລະບາດຂອງພະຍາດກັບມາດຕະການທາງເສດຖະກິດທີ່ບໍ່ສາມາດປະໃຫ້ມີການຢຸດສະງັກ ດ້ວຍເຫດນັ້ນ, ຄະນະສະເພາະກິດນະຄອນຫຼວງວຽງຈັນຈຶ່ງໃຫ້ຈໍາກັດບໍລິເວນສະເພາະບ້ານເຂດແດງ, ໜ່ວຍ, ຮ່ອມທາງ ຫຼື ເຮືອນທີ່ມີຜູ້ຕິດເຊື້ອເທົ່ານັ້ນ.

ແຫຼ່ງຂ່າວ: ໂທລະພາບແຫ່ງຊາດລາວ