ລົດໄຟຂະບວນທຳອິດຈະເດີນທາງມາເຖິງນະຄອນຫຼວງວຽງຈັນ ໃນວັນທີ 15 ຕຸລານີ້, ພາຍຫຼັງຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການສະບັບເລກທີ 1292/ຫສນຍ ວ່າດ້ວຍທິດຊີ້ນຳກ່ຽວກັບການຮັບຮອງການຕັ້ງຊື່ຂະບວນລົດໄຟໂດຍສານສາຍດ່ວນ (ຂະບວນທຳອິດ) ເພື່ອມາຮັບໃຊ້ການບໍລິການພາຍໃນປະເທດ ແລະສາກົນ ໂດຍເຫັນດີຮັບຮອງການຕັ້ງຊື່ຂະບວນລົດໄຟໂດຍສານສາຍດ່ວນດັ່ງກ່າວ ຄື “ຂະບວນລ້ານຊ້າງ”.
ສຳລັບຂະບວນລົດໄຟໂດຍສານສາຍດ່ວນ ທີ່ບໍລິສັດທາງລົດໄຟລາວ-ຈີນ ທີ່ມີແຜນຈະຈັດຊື້ມາໃໝ່ໃນຕໍ່ໜ້າອີກ 01 ຂະບວນນັ້ນ ແມ່ນເຫັນດີໃຫ້ຕັ້ງຊື່ “ຂະບວນແຄນລາວ”.
ຕາມການລາຍງານ ຂອງແຟນເພຈ ບໍລິສັດລົດໄຟລາວ-ຈີນ (Laos – China Railway Company Limited) ແຈ້ງຂ່າວໃຫ້ປະຊາຊົນລາວຊາບທົ່ວເຖິງກັນວ່າ ລົດໄຟລາວ-ຈີນ ຂະບວນ “ລ້ານຊ້າງ“ ຈະມາຮອດນະຄອນຫຼວງວຽງຈັນ, ສປປ ລາວ ໃນວັນສຸກ ວັນທີ 15 ຕຸລານີ້.
ພວກເຮົາມານັບຖອຍຫຼັງຕ້ອນຮັບລົດໄຟ EMU ຂະບວນທຳອິດໃນປະຫວັດສາດຂອງ ສປປ ລາວຂະບວນນີ້ໄປພ້ອມໆກັນ.