ລັດຖະບານໄດ້ວາງມາດຕະການກຽມພ້ອມຮັບມືກໍລະນີໂຮງໝໍປິ່ນປົວ ຫຼື ສູນຈຳກັດບໍລິເວນບໍ່ພຽງພໍກັບຈຳນວນຜູ້ຕິດເຊື້ອໃໝ່ ຫຼື ຜູ້ສຳຜັດໃກ້ຊິດກັບຜູ້ຕິດເຊື້ອໂຄວິດ-19 ທັງຮຽກຮ້ອງໃຫ້ປະຊາຊົນຕ້ອງໄດ້ເພີ່ມທະວີຄວາມເປັນເຈົ້າການຮັບມືກັບພະຍາດດັ່ງກ່າວໃຫ້ຫຼາຍຂຶ້ນ.
ທ່ານ ພັນຄໍາ ວິພາວັນ, ນາຍົກລັດຖະມົນຕີແຫ່ງ ສປປ ລາວ ກ່າວໃນໂອກາດພົບປະສື່ມວນຊົນທົ່ວປະເທດຜ່ານລະບົບທາງໄກ ໃນວັນທີ 6 ຕຸລາ 2021 ວ່າ: ຖ້າຫາກສູນປິ່ນປົວຜູ້ຕິດເຊື້ອພະຍາດໂຄວິດ-19 ແລະ ສູນຈໍາກັດບໍລິເວນບໍ່ສາມາດຮອງຮັບຈຳນວນຜູ້ຕິດເຊື້ອໃໝ່ກໍຄືຜູ້ສຳຜັດໃກ້ຊິດກັບຜູ້ຕິດເຊື້ອ, ລັດຖະບານ ຕ້ອງສົມທົບກັນໃນສອງດ້ານ ຄື: ພະຍາຍາມສະກັດກັ້ນບໍ່ໃຫ້ພະຍາດລະບາດຮ້າຍແຮງໄປກວ່ານີ້, ເຊິ່ງເຊື່ອວ່າຖ້າປະຊາຊົນ ແລະເຈົ້າໜ້າທີ່ທຸກພາກສ່ວນມີສ່ວນຮ່ວມ, ພ້ອມທັງມີການປິດລ້ອມວົງຈອນທີ່ເປັນສະຖານທີ່ຂອງການແຜ່ລະບາດ ທັງຢູ່ໃນໂຮງງານ ແລະບັນດາບ້ານທີ່ມີການລະບາດ. ສຳລັບທ້ອງຖິ່ນໃດທີ່ມີການລະບາດບໍ່ຮຸນແຮງ ຕ້ອງສຸມມາຊ່ວຍທ້ອງຖິ່ນທີ່ເປັນໜັກ, ທັງບຸກຄະລາກອນ, ອຸປະກອນການແພດ, ແລະຕຽງນອນຄົນເຈັບ. ນອກຈາກນີ້, ຕ້ອງໄດ້ຊຸກຍູ້ການສັກວັກຊິນຢ່າງເປັນລະບົບ ເພາະຈະເຮັດໃຫ້ອາການຕິດເຊື້ອບໍ່ເຖິງຂັ້ນຮຸນແຮງ, ບໍ່ເຈັບແຮງ ແລະການເສຍຊີວິດຈະໜ້ອຍທີ່ສຸດ.
ນາຍົກລັດຖະມົນຕີ ໃຫ້ຮູ້ຕື່ມວ່າ: ນອກຈາກນີ້, ລັດຖະບານຈະລະດົມໃຫ້ປະຊາຊົນສ້າງບ່ອນຈໍາກັດດ້ວຍຕົນເອງຕື່ມຖ້າມີຄວາມຈໍາເປັນ, ຄອບຄົວໃດມີສວນ, ມີໄຮ່-ນາ ເມື່ອສະມະຊິກໃນຄອບຄົວຕົນເອງຕິດເຊື້ອ ກໍ່ໄປກັກກັນຕົວຢູ່ຖຽງໄຮ່-ຖຽງນາ ຫຼື ຢູ່ສວນຂອງຕົນ ແຕ່ຕ້ອງຂຶ້ນທະບຽນຢ່າງເປັນລະບົບກັບເຈົ້າໜ້າທີ່ທາງການແພດ ແລະເຈົ້າໜ້າທີ່ຕຳຫຼວດ ເພື່ອຕິດຕາມກວດກາ, ການໃຫ້ຢາ, ສ່ວນຄອບຄົວກ່ຽວຂ້ອງຮັບຜິດຊອບອາຫານການກິນຢູ່ ເຊິ່ງສິ່ງນີ້ແມ່ນການມີສ່ວນຮ່ວມຂອງປະຊາຊົນໂດຍກົງ ແລະ ເປັນວິທີທີ່ຫຼາຍປະເທດປະຕິບັດໄດ້ຜົນມາແລ້ວ.
ຂໍ້ມູນຈາກ: Lao National Radio