ເວັບໄຊ Vice ລາຍງານ: ຊາຍເມົາເຫຼົ້າຊາວຕວັກກີ ໄວ 50 ປີ ໄດ້ເຂົ້າຮ່ວມທີມກັບກຸ່ມເຈົ້າໜ້າທີ່ກູ້ໄພ ເພື່ອຄົ້ນຫາຄົນຫາຍໃນປ່າແຫ່ງໜຶ່ງເຂດນອກເມືອງຂອງປະເທດຕວັກກີ ໂດຍໃຊ້ເວລາຫຼາຍຊົ່ວໂມງກວ່າຈະຮູ້ຄວາມຈິງວ່າ ຄົນຫາຍດັ່ງກ່າວແມ່ນຕົນເອງ.
ໃນອາທິດຜ່ານມາ, ຊາຍຄົນນີ້ໄດ້ອອກໄປດື່ມສັງສັນກັບເພື່ອນໃນຕອນຄໍ່າຈົນມີອາການມຶນເມົາແລ້ວຫາຍເຂົ້າໄປໃນປ່າແຫ່ງໜຶ່ງ ຂະນະທີ່ໝູ່ເພື່ອນກໍເປັນຫ່ວງເລື່ອງຄວາມປອດໄພ ເພາະບໍ່ເຫັນເຂົາອອກມາຈາກປ່າ ແລະກໍເປັນເວລາຄໍ່າຄືນ ຈິ່ງໄດ້ແຈ້ງເຈົ້າໜ້າທີ່ກູ້ໄພອອກຄົ້ນຫາຜູ້ກ່ຽວ ພ້ອມຮ້ອງຮຽກຊື່ຄົນຫາຍຕະຫຼອດເວລາ ຂະນະທີ່ພາລະກິດການຄົ້ນຫາໄດ້ເພີ່ມຈຳນວນພົນຫຼາຍຂຶ້ນເນື່ອງຈາກໃຊ້ເວລາຫຼາຍຊົ່ວໂມງແຕ່ກໍຍັງບໍ່ພົບຜູ້ກ່ຽວ.
ເວລາຜ່ານໄປຫຼາຍຊົ່ວໂມງ ຊາຍຄົນດັ່ງກ່າວຈິ່ງຮູ້ສຶກຕົວວ່າ ຄົນຫາຍນັ້ນແມ່ນຕົນເອງ ຂະນະທີ່ໝູ່ເພື່ອນ ລວມທັງເຈົ້າໜ້າທີ່ຍັງບໍ່ຮູ້ເລີຍວ່າ ຜູ້ກ່ຽວເຂົ້າຮ່ວມພາລະກິດຄົ້ນຫາຄົນຫາຍເມື່ອໃດ. ຢ່າງໃດກໍຕາມ, ເຈົ້າໜ້າທີ່ໄດ້ນຳເຂົາກັບຄືນເຮືອນຢ່າງປອດໄພ ແລະບໍ່ໄດ້ດຳເນີນການປັບໄໝ ຫຼື ລົງໂທດຊາຍຄົນນັ້ນແຕ່ຢ່າງໃດ.