ທັງຫຼໍ່ ທັງມີຄວາມສາມາດ ສໍາລັບ ເອ້ ອິນທະວົງ ນັກສະແດງ-ນາຍແບບ ໄວໜຸ່ມລາວ ທີ່ກໍາລັງມີຜົນງານຫຼາກຫຼາຍ ຢູ່ໃນວົງການບັນເທິງ ບໍ່ວ່າຈະເປັນ ຜົນງານທາງດ້ານຊີລີ້ ຫຼື ງານຖ່າຍແບບຕ່າງໆ. ເຊິ່ງຄັ້ງນີ້, ລາວໂພສຈະພາທຸກຄົນມາຮູ້ຈັກກັບ ເອ້ ອິນທະວົງ ນັກສະແດງໄວໜຸ່ມ ພະເອກຊີລີ້ເຊິ່ງມີຜົນງານຢູ່ຫຼາຍເລື່ອງ ທີ່ກໍາລັງມາແຮງໃນຕອນນີ້.
ຊື່ ໄຊບັນດິດ ອິນທະວົງ (ເອ້) ເກີດວັນທີ 12 ຕຸລາ ປີ 2001, ມີລວງສູງ 176 cm, ເປັນຄົນນະຄອນຫຼວງວຽງຈັນຕັ້ງແຕ່ກໍາເນີດ, ມີຄອບຄົວທັງໝົດ 5 ຄົນຄື: ແມ່, ພໍ່ຕູ້, ປ້າ, ລູກຂອງປ້າ ແລະ ເອ້ ເຊິ່ງເອ້ແມ່ນລູກຊາຍດຽວ. ຮຽນຈົບຈາກໂຮງຮຽນມັດທະຍົມສົມບູນ ປາດຖະໜາ, ປັດຈຸບັນກໍາລັງສຶກສາຢູ່ທີ່ ຄະນະເສດຖະສາດ ສາຂາການຕະຫຼາດ ມະຫາວິທະຍາໄລເເຫ່ງຊາດ.
1. ເຂົ້າມາເຮັດວຽກໃນວົງການບັນເທິງໄດ້ແນວໃດ?
ກ່ອນທີ່ຈະເຂົ້າມາມີຜົນງານຢູ່ໃນວົງການບັນເທິງແມ່ນ ເອ້ໄດ້ຖືກທາບທາມຈາກ ອ້າຍຊູໂມ້ ເຊິ່ງເພິ່ນເປັນເຈົ້າຂອງ Tara Academy ເຊິ່ງເປັນສັງກັດທີ່ລວມໄວໜຸ່ມລາວທີ່ເຮັດວຽກຢູ່ໃນວົງການບັນເທິງ ລາວໄດ້ເຫັນເອ້ຜ່ານທາງເຟສບຸກ ແລະ ຕິດຕໍ່ເອ້ມາຖາມເອ້ວ່າສົນໃຈໃນດ້ານນີ້ບໍ່ ໃນເມື່ອມີໂອກາດດີໆເຂົ້າມາແບບນີ້ ເອ້ກໍເລີຍເລືອກທີ່ຈະບໍ່ປະຕິເສດ ເຊິ່ງນັ້ນກໍເປັນບາດກ້າວທໍາອິດທີ່ເຮັດໃຫ້ເອ້ໄດ້ເຂົ້າມາໃນວົງການບັນເທິງລາວ.
2. ຜົນງານທໍາອິດຂອງເອ້?
ຜົນງານທໍາຂອງເອ້ ແມ່ນ ຊີລີ້ທີ່ມີຊື່ເລື່ອງວ່າ “Diary Love The series ຮັກວຸ້ນໆຄຸນໜູເນ່ເນ້” ເຊິ່ງຕອນນັ້ນແມ່ນໄດ້ສະແດງເປັນຕົວປະກອບ. ຄັ້ງທໍາອິດທີ່ໄດ້ມາຢູ່ໜ້າກ້ອງແມ່ນຮູ້ສຶກຕື່ນເຕັ້ນ ເເລະ ປະທັບໃຈທີ່ສຸດ ບໍ່ຄິດເລີຍວ່າຕົນເອງຈະໄດ້ມີໂອກາດມາເປັນນັກສະແດງໃນຊີລີ້ເລື່ອງນີ້ ເຖິງຈະເປັນພຽງຕົວປະກອບກໍຕາມ. ຫຼັງຈາກນັ້ນບໍ່ດົນ ເອ້ກໍໄດ້ມີໂອກາດຂຶ້ນມາເປັນນັກສະແດງຫຼັກຢ່າງເຕັມໂຕ ໃນຊີ່ລີ້ຫຼາຍເລື່ອງເຊັ່ນ: ຮັກນີ້ສີບົວ 3, ປະຕິຫານດອກໄມ້, ຮູບເງົາ The Signal ແລະ One Love The Series.
3. ເຊື່ອວ່າສາວໆຫຼາຍໆຄົນກໍາລັງລໍຖ້າຄໍາຖາມນີ້ ສະເປັກເອ້ມັກຜູ້ຍິງແບບໃດ?
ເອ້ມັກຜູ້ຍິງທີ່ ເວລາໄດ້ລົມນໍາເເລ້ວຮູ້ສຶກອົບອຸ່ນ, ນິໄສຜູ້ໃຫຍ່ ເເລະ ລົມນໍາໄດ້ທຸກເລື່ອງ ຮັບໃນສິ່ງທີ່ເຮົາເປັນໄດ້ ເອ້ກໍໂອເຄເເລ້ວ.
4. ນອກຈາກວຽກໃນວົງການບັນເທິງແລ້ວ ເອ້ມີສິ່ງທີ່ຢາກເຮັດອີກບໍ່?
ນອກຈາກວຽກໃນວົງການບັນເທິງ ເອ້ກະມີຄວາມຝັນຢາກຈະເຮັດວົງດົນຕີນໍາໝູ່ ແລະ ຄວາມຝັນຂອງເອ້ອີກຢ່າງໜຶ່ງທີ່ຢາກເປັນຕັ້ງເເຕ່ນ້ອຍເລີຍກໍຄື ຢາກເປັນທະຫານນັກບິນອາກາດ ເພາະວ່າພໍ່ຕູ້ຂອງເອ້ເພິ່ນເປັນທະຫານນັກບິນອາກາດ ເອ້ເຫັນຕັ້ງແຕ່ຍັງນ້ອຍເລີຍຮູ້ສຶກຢາກເປັນຄືເພິ່ນ.
5. ຝາກຜົນງານປັດຈຸບັນ
ຜົນງານປັດຈຸບັນຂອງເອ້ເເມ່ນ ຊີລີ້ເລື່ອງ “7 days 7 boys” ເປັນຊີລີ້ວາຍລາວເລື່ອງໃໝ່ ກັບການຖ່າຍທອດເລື່ອງລາວຄວາມສຳພັນຄວາມຮັກໃນຫຼາກຫຼາຍມຸມມອງ ເຊິ່ງກໍາລັງຈະອອນເເອໃນໄວໆນີ້ ຝາກຕິດຕາມກັນແດ່ເດີ້.
ສໍາລັບໃຜທີ່ອ່ານບົດສໍາພາດນີ້ແລ້ວ ຢາກໄປຕິດຕາມ ເອ້ ອິນທະວົງ ສາມາດເຂົ້າໄປຕິດຕາໄດ້ທີ່ ເຟສບຸກ: Aey Inthavong, ເພຈ: Aey Inthavong TARA, ເພຈ: Tara academy, ໄອຈີ: aey_inthavong