ເວັບໄຊ້ Khaosod ໄດ້ລາຍງານວ່າ ບໍລິສັດ ໂຄລອສຊອລ ບໍລິສັດດ້ານຊີວະວິທະຍາສາດ ແລະ ພັນທຸສາດ ທີ່ສ້າງຕັ້ງຂຶ້ນໂດຍທ່ານ Ben Lamm ເຈົ້າຂອງທຸລະກິດດ້ານເທັກໂນໂລຊີ ແລະ ຊອຟແວ ແລະ ທ່ານ Dr. George Church ສາດສະດາຈານທາງດ້ານພັນທຸສາດຈາກໂຮງຮຽນແພດຮາວາດ ຮ່ວມກັບຜູ້ບຸກເບີກແນວທາງການຕັດຕໍ່ກໍາມະພັນ ໄດ້ປະກາດລົງທຶນປະມານ 15 ລ້ານດອລລ້າ ເພື່ອເພາະພັນຊ້າງ ແມມມອທ (Mammoth) ໃຫ້ມີຊີວິດອີກຄັ້ງ.
ໃນເບື້ອງຕົ້ນທີມນັກວິທະຍາສາດຈະເພາະພັນລູກປະສົມຂອງຊ້າງແມມມອທ ໂດຍການສ້າງໂຕອ່ອນໃນຫ້ອງທົດລອງທີ່ມີ DNA ຂອງຊ້າງແມມມອທ ໂດຍຈະນໍາເອົາກໍາມະພັນຈາກຜິວໜັງຂອງຊ້າງອາຊີມາປັບປ່ຽນໃຫ້ເປັນຈຸລັງຕົ້ນກໍາເນີດທີ່ຫຼາກຫຼາຍຂຶ້ນ ແລະ ເປັນຈຸລັງທີ່ຮອງຮັບ DNA ຂອງ ແມມມອທ (Mammoth). ຈາກນນັ້ນ, ໂຕອ່ອນຈະຖືກນໍາໄປໄວ້ກັບຊ້າງໂຕອື່ນທີ່ເອີ້ນກັນວ່າຊ້າງອຸ້ມບຸນ ແລະ ຖ້າຫາກຂະບວນການຕ່າງໆເປັນໄປຕາມທີ່ຕັ້ງສັນນິຖານໄວ້ ນັກວິໄຈກໍຈະໄດ້ລູກຊ້າງແມມມອທພັນປະສົມກຸ່ມທໍາອິດໃນໄລຍະເວລາ 6 ປີ.
ນອກຈາກນີ້, ຍັງເຊື່ອວ່າການນໍາເອົາຝູງຊ້າງປະສົມແມມມອທເຂົ້າໄປອາໄສຢູ່ໃນຫິມະເຂດຂົ້ວໂລກອາດຈະຊ່ວຍຟື້ນຟູຄວາມເສຍຫາຍຂອງໂລກຮ້ອນ ເຊິ່ງເປັນສ່ວນໜຶ່ງຂອງຜົນກະທົບຈາກວິກິດສະພາບອາກາດປ່ຽນແປງ.