ເວັບໄຊ້ Posttoday ໄດ້ລາຍງານວ່າ: ບໍລິສັດ EnGeneIC Limited ຈາກປະເທດອົດສະຕຣາລີໄດ້ພັດທະນາວັກຊີນໂຄວິດ-19 ດ້ວຍເທັກໂນໂລຊີ Nanocellular ເປັນຄັ້ງທໍາອິດຂອງໂລກ ໂດຍຜ່ານການທົດລອງໃນສັດແລ້ວພົບວ່າ ວັກຊີນສາມາດກະຕຸ້ນການຕອບສະໜອງຂອງພູມຄຸ້ມກັນຕ້ານພະຍາດໂຄວິດ-19 ສາຍພັນເດລຕ້າໄດ້.
ວັກຊີນດັ່ງກ່າວມີຊື່ວ່າ: EDV ໂດຍຈາກການທົດລອງໃນສັດພົບວ່າສາມາດສ້າງພູມຄຸ້ມກັນຕ້ານໂຄວິດ-19 ສາຍພັນເດລຕ້າໄດ້ສູງເຖິງ 95% ຕະຫຼອດຈົນສາມາດຮັບມືກັບໂຄວິດ-19 ສາຍພັນອື່ນໆໄດ້ອີກດ້ວຍ.
ນອກຈາກນີ້, ຈຸດເດັ່ນທີ່ສໍາຄັນອີກຢ່າງໜຶ່ງຂອງວັກຊີນຊະນິດໃໝ່ນີ້ກໍຄືສາມາດເກັບໄວ້ໃນອຸນຫະພູມປົກກະຕິໄດ້ ແລະ ມີອາຍຸໃນການເກັບຮັກສາດົນເຖິງ 3 ປີ ເຊິ່ງເຮັດໃຫ້ງ່າຍຕໍ່ການຂົນສົ່ງ. ບໍລິສັດຜູ້ຜະລິດໄດ້ເລີ່ມທົດລອງວັກຊີນໃນໄລຍະທໍາອິດໃນມະນຸດໂດຍເລີ່ມຈາກອາສາສະໝັກຜູ້ໃຫຍ່ຈໍານວນ 2 ຄົນທີ່ມີສຸຂະພາບແຂງແຮງ ເພື່ອທົດສອບຄວາມປອດໄພ ແລະ ປະສິດທິພາບໃນການສ້າງພູມຄຸ້ມກັນຂອງວັກຊີນ.