ເວັບໄຊ້ Khaosod ໄດ້ລາຍງານວ່າ ກະຊວງສາທາລະນະສຸກຂອງລັດເກລະ ທາງຕາເວັນຕົກສ່ຽງໃຕ້ຂອງປະເທດອິນເດຍໄດ້ອອກຖະແຫຼງການວ່າ ມີເດັກນ້ອຍເພດຊາຍ ອາຍຸ 12 ປີ ໄດ້ເຂົ້າຮັບການປິ່ນປົວໃນໂຮງໝໍພາຍຫຼັງທີ່ມີການຕິດເຊື້ອໄວຣັສນິປາ (Nipah Virus) ໃນວັນທີ 3 ກັນຍາ 2021 ທີ່ຜ່ານມາ ແລະ ເສຍຊີວິດໃນວັນທີ 5 ກັນຍາ 2021.

ພາຍຫຼັງທີ່ກະຊວງສາທາລະນະສຸກອອກມາຖະແຫຼງຂ່າວ ປະຊາຊົນສ່ວນໃຫຍ່ກໍເກີດຄວາມກັງວົນວ່າໄວຣັສນິປາຈະກັບມາລະບາດອີກຄັ້ງໜຶ່ງ ແລະ ຈະລະບາດຮ່ວມກັບພະຍາດໂຄວິດ-19 ໃນຂະນະນີ້ມີຜູ້ຕິດເຊື້ອໂຄວິດ-19 ໃໝ່ 42,924 ຄົນ ພາຍໃນໄລຍະເວລາ 24 ຊົ່ວໂມງ ສົ່ງຜົນເຮັດໃຫ້ຈຳນວນຜູ້ຕິດເຊື້ອສະສົມທັງໝົດຢ່າງໜ້ອຍ 32,9 ລ້ານຄົນ ແລະ ມີຜູ້ເສຍຊີວິດ 440,567 ຄົນ.

ເຊື້ອໄວຣັສ ນິປາ (Nipah) ເປັນພະຍາດຕິດຕໍ່ລະຫວ່າງສັດ ແລະ ຄົນ ໂດຍຜ່ານການ ສຳຜັດກັບມູນຂອງສັດ ແລະຂອງເຫຼວຈາກສັດ ໂດຍສະເພາະຈາກໂຕເຈຍ.