ເວັບໄຊ Global Times ລາຍງານ: ລັດຖະບານຈີນໄດ້ສັ່ງຫ້າມຜູ້ຊາຍທີ່ແຕ່ງກາຍຄ້າຍຄືແມ່ຍິງອອກອາກາດທາງໂທລະພາບ ອ້າງຂັດກັບວັດທະນະທຳ ພ້ອມເລັ່ງຂະຫຍາຍການລົນນະລົງເພື່ອຄວບຄຸມດ້ານທຸລະກິດ ແລະ ສັງຄົມ ທັງບັງຄັບໃຊ້ລະບຽບການວ່າດ້ວຍຄຸນນະທຳທີ່ທາງການກຳນົດອອກ.
ທາງການໄດ້ສັ່ງຫ້າມບັນດາສື່ອອກອາກາດຕ່າງໆໃນຈີນໃຫ້ຢຸດເຊົາໂຄສະນາສົ່ງເສີມຄວາມຄັ່ງໄຄ້ຜູ້ຊາຍທີ່ມີລັກສະນະຄ້າຍຄືແມ່ຍິງ ຫຼື ຜູ້ຊາຍທີ່ແຕ່ງກາຍຕາມແຟຊັ່ນອື່ນໆຄ້າຍຄືແມ່ຍິງ ພ້ອມທັງຫຼີກລ່ຽງການສົ່ງເສີມຄົນດັງທາງອິນເຕີເນັດທີ່ປະພຶດ ແລະ ເວົ້າຈາບໍ່ສຸພາບ ໂດຍອ້າງເຖິງຄວາມເປັນຫ່ວງເລື່ອງວັດທະນະທຳທີ່ບໍ່ຖືກຕ້ອງຕາມທຳນອງຄອງທຳ ອັນຈະເປັນການຊັກນຳເຍົາວະຊົນໃຫ້ຫຼົງປະພຶດຕົນໃນທາງທີ່ຜິດ. ພ້ອມກັນນັ້ນ, ລັດຖະບານຍັງໄດ້ຄວບຄຸມບັນດາອຸດສາຫະກຳທາງອິນເຕີເນັດຂອງຈີນຢ່າງເຂັ້ມງວດ.
ປະທານາທິບໍດີ ສີ ຈິນຜິງ ໄດ້ຮຽກຮ້ອງໃຫ້ມີ “ການຟື້ນຟູລະດັບຊາດ” ດ້ວຍການຄວບຄຸມດ້ານທຸລະກິດ, ການສຶກສາ, ວັດທະນະທຳ ແລະ ສາສະໜາຂອງພັກກອມມູຍນິດ ທັງນີ້ກໍເພື່ອເຮັດໃຫ້ສອດຄ່ອງກັບວິໄສທັດໃນການກໍ່ສ້າງປະເທດຈີນໃຫ້ມີອຳນາດເພີ່ມຂຶ້ນ ແລະ ສັງຄົມມີສຸຂະພາບດີຂຶ້ນ ຂະນະນະທີ່ລັດຖະບານຍັງໄດ້ຫຼຸດຜ່ອນການເຂົ້າເຖິງເກມອອນລາຍຂອງເດັກນ້ອຍເຍົາວະຊົນນຳອີກ.
ການຈັດຕັ້ງເຄື່ອນໄຫວດັ່ງກ່າວມີຂຶ້ນໃນຂະນະທີ່ຈີນເລີ່ມດຳເນີນການຄວບຄຸມຊີວິດສ່ວນຕົວຂອງພົນລະເມືອງຕົນໃຫ້ເຂັ້ມງວດເພີ່ມຂຶ້ນ ໂດຍມີຂ່າວວ່າ ລັດຖະບານຈີນຈະຈຳກັດການນຳໃຊ້ເກມຄອມພິວເຕີສຳລັບກຸ່ມເຍົາວະຊົນໃນຕົ້ນເດືອນນີ້.