ເວັບໄຊ VN Express ລາຍງານ: ສູນຄວບຄຸມ ແລະ ປ້ອງກັນພະຍາດຂອງສະຫະລັດອາເມລິກາ (CDC) ໄດ້ເປີດສາຂາໃໝ່ໃນອາຊີ ຕາເວັນອອກສ່ຽງໃຕ້ ຢູ່ນະຄອນຫຼວງຮ່າໂນ້ຍ, ປະເທດຫວຽດນາມ ເພື່ອອຳນວຍຄວາມສະດວກໃນການຮັບມືກັບການແຜ່ລະບາດຂອງໂຄວິດ-19 ລວມທັງພະຍາດລະບາດອື່ນໆທີ່ອາດເກີດຂຶ້ນໃນອະນາຄົດ.
ທ່ານ ນາງ ກາມາລາ ຮາຣີສ (Kamala Harris), ຮອງປະທານາທິບໍດີ ສະຫະລັດອາເມລິກາ ກ່າວໃນມື້ເປີດງານໃນວັນທີ 25 ສິງຫາຜ່ານມາວ່າ: ການລະບາດໃຫຍ່ຂອງໂຄວິດ-19 ໄດ້ໃຫ້ບົດຮຽນແກ່ຫຼາຍປະເທດໃນໂລກ ພ້ອມເຂົ້າໃຈວ່າ ໂລກມີຄວາມເຊື່ອມໂຍງເຖິງກັນ ທັງຈຳເປັນຕ້ອງໄດ້ເພິ່ງພາອາໄສກັນຫຼາຍຂຶ້ນກວ່າແຕ່ກ່ອນ ຂະນະທີ່ສະຫະລັດຕ້ອງການເຮັດວຽກຮ່ວມກັບບັນດາປະເທດອາຊຽນ ເພື່ອປັບປຸງຄວາມພ້ອມ ແລະ ການຕອບສະໜອງໃນກໍລະນີທີ່ເກີດການລະບາດໃຫຍ່ໃນອະນາຄົດ ຫຼື ວິກິດດ້ານສາທາລະນະສຸກຢ່າງບໍ່ສາມາດຫຼີກລຽງໄດ້. ສະນັ້ນ, ການເປີດຫ້ອງການຊີດີຊີລະດັບພາກພື້ນ ຈິ່ງຖືເປັນເຄື່ອງພິສູດໃຫ້ເຫັນເຖິງຄວາມມຸ່ງໝັ້ນຂອງສະຫະລັດອາເມລິກາທີ່ມີຕໍ່ພາກພື້ນກໍຄືໂລກ.
“ສະຫະລັດອາເມລິກາໄດ້ໃຫ້ການຊ່ວຍເຫຼືອວັກຊີນທົ່ວໂລກແລ້ວປະມານ 110 ລ້ານໂດສ, ໃນນັ້ນ 23 ລ້ານໂດສໄດ້ສົ່ງມອບໃຫ້ກັບບັນດາປະເທດໃນອາຊີ ຕາເວັນອອກສ່ຽງໃຕ້ ເຊິ່ງລັດຖະບານສະຫະລັດຍັງຈະມອບເງິນຈຳນວນ 500.000 ໂດລາສະຫະລັດໃຫ້ແກ່ກອງທຶນອາຊຽນເພື່ອຮັບມືກັບໂຄວິດ-19 ເພື່ອນຳໃຊ້ເຂົ້າໃນການຈັດຊື້ວັກຊີນເພີ່ມ.” ທ່ານ ນາງ ກາມາລາ ຮາຣີສ ກ່າວ.