ເວັບໄຊໄທຣັດອອນໄລນ໌ລາຍງານ: ທາງການໄດ້ອອກໝາຍຈັບຜູ້ກຳກັບໂຈ້ພ້ອມພັກພວກຮ່ວມຂະບວນການ 6 ຄົນທີ່ໃຊ້ຖົງຄຸມຫົວພໍ່ຄ້າຢາເສບຕິດລາຍໜຶ່ງຈົນເສຍຊີວິດທີ່ສະຖານີຕຳຫຼວດປະເທດໄທ ຂະນະທີ່ຜູ້ກ່ຽວພະຍາຍາມຫຼົບໜີຈາກການຈັບກຸມ ເຮັດໃຫ້ເຈົ້າໜ້າທີ່ຢ້ານວ່າຜູ້ກ່ຽວອາດຂ້າມໜີໄປທາງຝັ່ງລາວ, ຈິ່ງໄດ້ດຳເນີນການລາດຕາເວນຕາມຊ່ອງທາງຊາຍແດນລະຫວ່າງສອງປະເທດຢ່າງເຄັ່ງຄັດ.
ເນື່ອງຈາກມີຄຼິບວີດີໂອຂອງກຸ່ມຕຳຫຼວດປາບປາມຢາເສບຕິດໄທເຊິ່ງມີຜູ້ກຳກັບໂຈ້ເປັນຫົວໜ້າ ໄດ້ໃຊ້ຖົງຢາງຫຼາຍຊັ້ນຄຸມຫົວຜູ້ຕ້ອງຫາຢາເສບຕິດລາຍໜຶ່ງເພື່ອທໍລະມານຫວັງຮຽກເງິນ 2 ລ້ານບາດ ຈົນເຮັດໃຫ້ຜູ້ກ່ຽວເສຍຊີວິດ ແຕ່ຜູ້ກຳກັບໂຈ້ໄດ້ສັ່ງໃຫ້ພັກພວກລາຍງານແພດວ່າ ຜູ້ຕ້ອງຫາເສບຢາເກີນຂະໜາດຈົນພາໃຫ້ເສຍຊີວິດ. ຂະນະທີ່ທາງການໄດ້ອອກໝາຍຈັບຜູ້ກຳກັບໂຈ້ພ້ອມພັກພວກມາດຳເນີນຄະດີຕາມກົດໝາຍ ແຕ່ຜູ້ກ່ຽວໄດ້ເອົາຕົວຫຼົບໜີ ເຮັດໃຫ້ທາງການຢ້ານວ່າຜູ້ກ່ຽວອາດຈະຂ້າມໄປຝັ່ງລາວເພື່ອຫຼົບໜີ ຂະນະທີ່ລູກນ້ອງ 5 ຄົນຖືກຈັບກຸມແລ້ວ.
ຫຼ້າສຸດທາງເຈົ້າໜ້າທີ່ໄດ້ກະຈາຍກຳລັງສະກັດກັ້ນທັງລາດຕາເວນຕາມຊາຍແດນຕ່າງໆ ໂດຍສະເພາະເຂດຊາຍແດນວຽງຈັນ-ໜອງຄາຍ ແລະ ເຂດຊາຍແດນປາກຊັນ-ບຶງການ ພ້ອມປະສານງານຫາພາກສ່ວນກ່ຽວຂ້ອງເພື່ອສະກັດກັ້ນເສັ້້ນທາງຫຼົບໜີຂອງຜູ້ກຳກັບໂຈ້. ຢ່າງໃດກໍຕາມ, ເຈົ້າໜ້າທີ່ເຊື່ອວ່າຜູ້ກ່ຽວຍັງອາໄສຢູ່ໃນປະເທດໄທ.