ແຂວງສະຫວັນນະເຂດສືບຕໍ່ລັອກດາວພ້ອມຄຸມເຂັ້ມມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ພາຍໃນແຂວງ ເນື່ອງຈາກຈຳນວນຜູ້ຕິດເຊື້ອໃນຊຸມຊົນເພີ່ມຂຶ້ນເຖິງ 80 ກໍລະນີ ໃນ 24 ບ້ານ ຂະນະທີ່ສະພາບການແຜ່ລະບາດຍັງຢູ່ໃນເກນທີ່ບໍ່ສາມາດຄວບຄຸມໄດ້.
ອີງຕາມແຈ້ງການທີ່ອອກໂດຍເຈົ້າແຂວງສະຫວັນນະເຂດ ໃນວັນທີ 23 ສິງຫາວ່າດ້ວຍການສືບຕໍ່ປະຕິບັດມາດຕະການປ້ອງກັນ, ສະກັດກັ້ນ ແລະ ຄວບຄຸມການລະບາດພະຍາດໂຄວິດ-19 ໂດຍສັ່ງຫ້າມບໍ່ໃຫ້ມີການເດີນທາງເຂົ້າ-ອອກເຂດທີ່ມີການຕິດເຊື້ອ (ເຂດແດງ) ແລະ ເຂດທີ່ມີຄວາມສ່ຽງ (ເຂດເຫຼືອງ) ຍົກເວັ້ນຜູ້ທີ່ໄດ້ຮັບອະນຸຍາດຈາກອົງການປົກຄອງທ້ອງຖິ່ນ, ຫ້າມຜູ້ສຳຜັດໃກ້ຊິດກັບຜູ້ຕິດເຊື້ອເດີນທາງໄປເຂດນອກເດັດຂາດ, ທັງຫ້າມບໍ່ໃຫ້ມີການຈັດຊຸມນຸມທີ່ມີຄົນເຂົ້າຮ່ວມຫຼາຍກວ່າ 10 ຄົນ, ສືບຕໍ່ໂຈະການຮຽນ-ການສອນນັບແຕ່ລະດັບອະນຸບານຈົນເຖິງຂັ້ນມະຫາວິທະຍາໄລ, ພ້ອມໃຫ້ສືບຕໍ່ປິດກິດຈະການຊົ່ວຄາວໃນຂອບເຂດນະຄອນໄກສອນພົມວິຫານ ຍົກເວັ້ນຮ້ານອາຫານແຕ່ຕ້ອງບໍລິການແບບຊື້ໄປກິນຢູ່ເຮືອນ ທັງສືບຕໍ່ໂຈະການຂົນສົ່ງໂດຍສານທຸກປະເພດ.
ເນື່ອງຈາກສະພາບການລະບາດພະຍາດໂຄວິດ-19 ໃນຊຸມຊົນຂອງນະຄອນໄກສອນພົມວິຫານນັບແຕ່ວັນທີ 2 ສິງຫາມາເຖິງປັດຈຸບັນມີຈຳນວນເພີ່ມຂຶ້ນ 80 ກໍລະນີ, ກວມ 24 ບ້ານ ເຊິ່ງສະພາບການລະບາດຂອງພະຍາດດັ່ງກ່າວຍັງບໍ່ສາມາດຄວບຄຸມໄດ້ໃນປັດຈຸບັນ ແລະ ຍັງມີທ່າອ່ຽງເພີ່ມຂຶ້ນໃນແຕ່ລະວັນ.
