ສຳນັກຂ່າວ Reuters ລາຍງານ: ວິຕາລີ ຊິຊອຟ, ໄວ 26 ປີ ຫົວໜ້າກຸ່ມລີ້ໄພຊາວເບລາຣຸດ ທີ່ອາໄສໃນຢູເຄຣນຖືກພົບແຂວນຄໍເສຍຊີວິດ ຢູ່ສວນສາທາລະນະໃກ້ບ່ອນພັກ ຊ່ວງຕອນເຊົ້າຂອງວັນທີ 3 ສິງຫາຜ່ານມາ ຂະນະທີ່ເຈົ້າໜ້າທີ່ຕຳຫຼວດຢູເຄຣນເລີ່ມດຳເນີນການສອບສວນໂດຍມຸ່ງເປົ້າໃສ່ຄະດີຄາຕະກຳ.
ທ່ານ ອິຮໍ ຄລີເມນໂກ, ຫົວໜ້າກອງບັນຊາການຕຳຫຼວດແຫ່ງຊາດຢູເຄຣນ ກ່າວວ່າ: ເຈົ້າໜ້າທີ່ກຳລັງພິຈາລະນາການສືບສວນຄວາມເປັນໄປໄດ້ຂອງການຂ້າໂຕຕາຍ ຫຼື ການຄາຕະກຳທີ່ແຝງຊ້ອນດ້ວຍດ້ວຍການຂ້າໂຕຕາຍ ເນື່ອງຈາກທາງຕຳຫຼວດກວດພົບຮອຍບາດແຜທີ່ບໍລິເວນດັງຂອງຜູ້ຕາຍ.
ຊິຊອຟ ໜີອອກຈາກເບລາຣຸດ ເມື່ອປີກາຍ ພາຍຫຼັງເຂົ້າຮ່ວມຂະບວນການປະທ້ວງຕໍ່ຕ້ານລັດຖະບານ ຂະນະທີ່ປະຊາຊົນຫຼາຍພັນຄົນ ພ້ອມຜູ້ນຳຝ່າຍຄ້ານຖືກຈັບກຸມ ແລະຊາວເບລາຣຸດ ຈຳນວນໜຶ່ງໄດ້ອົບພະຍົບໜີໄປລີ້ໄພຢູ່ ຢູເຄຣນ, ໂປແລນ ແລະ ລິທົວເນຍ.