ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ອອກແຈ້ງການສັ່ງປິດການເດີນທາງເຂົ້າ-ອອກ ເຂດເສດຖະກິດພິເສດສາມຫຼ່ຽມຄຳເປັນເວລາ 15 ວັນ ເນື່ອງຈາກກໍລະນີກວດພົບຜູ້ຕິດເຊື້ອໂຄວິດ-19 ຢູ່ແຂວງຫຼວງນໍ້າທາ ແລະ ຄຳມ່ວນ ເຊິ່ງເປັນກໍລະນີທີ່ເດີນທາງຈາກເຂດເສດຖະກິດພິເສດສາມຫຼ່ຽມຄຳ, ທັງນີ້ກໍເພື່ອເປັນການປ້ອງກັນ ແລະ ຄວບຄຸມການຕິດເຊື້ອ ບໍ່ໃຫ້ມີການແຜ່ລະບາດເປັນວົງກວ້າງ.
ການປິດການເດີນທາງເຂົ້າ-ອອກ ພາຍໃນເຂດເສດຖະກິດພິເສດສາມຫຼ່ຽມຄຳດັ່ງກ່າວ ແມ່ນເລີ່ມແຕ່ວັນທີ 1 ສິງຫາ ຈົນເຖິງວັນທີ 15 ສິງຫາ, ຂະນະທີ່ທາງເຈົ້າໜ້າທີ່ແພດໝໍກໍໄດ້ຮີບຮ້ອນປະສານງານກັບພາກສ່ວນກ່ຽວຂ້ອງເພື່ອຄົ້ນຫາຜູ້ສຳຜັດໃກ້ຊິດກັບກໍລະນີຕິດເຊື້ອດັ່ງກ່າວ ເພື່ອແຍກຕົວ ແລະ ກວດຫາເຊື້ອ ຫຼື ປິ່ນປົວໃຫ້ທັນເວລາ.
ສ່ວນຈຸດກວດກາຕ່າງໆ ລວມທັງບ້ານທີ່ຢູ່ໃກ້ຄຽງເຂດຊາຍແດນ, ຫຼື ຕິດກັບເຂດທີ່ມີຄວາມສ່ຽງກໍໄດ້ເພີ່ມທະວີໃນການຕິດຕາມ, ກວດກາການລັກລອບເຂົ້າ-ອອກເຂດດັ່ງກ່າວຢ່າງເຂັ້ມງວດ.