ປັດຈຸບັນ ສປປ ລາວ ກວດພົບການຕິດເຊື້ອໃນກຸ່ມພະນັກງານດ່ານໜ້າ ທີ່ປະຕິບັດໜ້າທີ່ໃນການປ້ອງກັນ ແລະ ປີ່ນປົວຜູ້ປ່ວຍໂຄວິດ-19 ໃນບັນດາແຂວງຕ່າງໆສູງເຖີງ 50 ຄົນ.
ທ່ານ ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນພິທີຖະແຫຼງຂ່າວສະພາບການລະບາດພະຍາດໂຄວິດ-19 ປະຈໍາວັນທີ 30 ກໍລະກົດ 2021 ວ່າ ສປປ ລາວ ພົບການຕິດເຊື້ອໃນພະນັກງານດ່ານໜ້າທີ່ປະຕິບັດໜ້າທີ່ໃນການປ້ອງກັນ ແລະ ປີ່ນປົວຄົນເຈັບ ໃນບັນດາແຂວງຕ່າງໆເຖີງ 50 ຄົນ ໃນນັ້ນ ພະນັກງານແພດໝໍ ມີຈໍານວນ 39 ຄົນ, ພະນັກງານເຮັດວຽກຢູ່ສູນຈຳກັດບໍລິເວນ 6 ຄົນ ແລະ ພະນັກງານປະຈຳດ່ານ 5 ຄົນ ແລະ 64% ແມ່ນມີອາການສະແດງອອກ.
ສຳລັບແຂວງທີ່ຕິດເຊື້ອຫຼາຍກ່ວາໝູ່ ກໍແມ່ນນະຄອນຫຼວງວຽງຈັນ ມີ 24 ຄົນ, ຮອງລົງມາແມ່ນແຂວງຈຳປາສັກມີ 19 ຄົນ ຂະນະທີ່ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 60 ສູນ ແລະ ມີຜູ້ຈຳກັດບໍລິເວນ 9,464 ຄົນ.