ສຳນັກຂ່າວ BEIJING: ໃນວັນທີ 29 ກໍລະກົດຜ່ານມາ ຈີນມີການລາຍງານການລະບາດໂຄວິດ-19 ທີ່ເກີດຈາກສາຍພັນເດວຕ້າໃນສາມແຂວງ ຍ້ອນການແຜ່ເຊື້ອຂອງກຸ່ມຜູ້ເດີນທາງຈາກສະໜາມບິນທາງທິດຕາເວັນອອກ ເຖິງແມ່ນຈະມີການກວດຫາເຊື້ອຢ່າງລະອຽດ ພ້ອມສັກວັກຊີນແລ້ວກໍຕາມ.
ການແຜ່ລະບາດເກີດຂຶ້ນພາຍຫຼັງພະນັກງານ 9 ຄົນທີ່ເຮັດວຽກໃນສະໜາມບິນໜານຈິງ ກວດພົບເຊື້ອໂຄວິດ ໃນວັນທີ 20 ກໍລະກົດຜ່ານມາ ເຊິ່ງທາງການຈີນກໍໄດ້ຮີບຮ້ອນກວດຫາເຊື້ອໂຄວິດໃນກຸ່ມຄົນທີ່ກ່ຽວຂ້ອງ ພ້ອມສັກວັກຊີນໃຫ້ປະຊາຊົນເປັນຈຳນວນຫຼາຍ. ຂະນະທີ່ມີການກວດພົບການຕິດເຊື້ອໃນສະໜາມບິນ ກໍມີລາຍງານຈຳນວນຜູ້ຕິດເຊື້ອໃນແຂວງຈຽງຊູ 171 ລາຍ, ພ້ອມກັນນີ້ ສາຍພັນເດວຕ້າຍັງມີການລະບາດໄປສູ່ແຂວງຕ່າງໆອີກ ໂດຍສະເພາະກໍແມ່ນບັນດາແຂວງທີ່ມີຊາຍແດນຕິດຈອດກັບປະເທດມຽນມາ.
ແຂວງຈຽງຊູໄດ້ປະກາດລັອກດາວເພື່ອສະກັດກັ້ນການແຜ່ລະບາດຂອງພະຍາດໂຄວິດ ພ້ອມເລັ່ງກວດຫາເຊື້ອຄັ້ງໃຫຍ່ໃຫ້ປະຊາຊົນ 9 ລ້ານກວ່າຄົນເປັນຄັ້ງທີສອງ, ສ່ວນແຂວງເສສວນທີ່ຕັ້ງຢູ່ພາກຕາເວັນອອກສ່ຽງໃຕ້ຂອງປະເທດກໍມີລາຍງານຜູ້ຕິດເຊື້ອລາຍໃໝ່ 3 ລາຍໃນມື້ວານນີ້, ສ່ວນປັກກິ່ງແມ່ນກວດພົບແລ້ວ 1 ລາຍ.
ຢ່າງໃດກໍຕາມ, ຜູ້ປ່ວຍທີ່ກວດພົບເຊື້ອໂຄວິດໃນການລະບາດຮອບໃໝ່ສ່ວນໃຫຍ່ແມ່ນໄດ້ສັກວັກຊີນຄົບສອງເຂັມແລ້ວ ອັນໄດ້ສ້າງຄວາມກັງວົນເລື່ອງປະສິດທິພາບຂອງວັກຊີນໃນການຮັບມືກັບເຊື້ອກາຍພັນ ຂະນະທີ່ຈີນກຳລັງເລັ່ງສັກວັກຊີນໃຫ້ພົນລະເມືອງຂອງຕົນໃຫ້ໄດ້ປະມານ 65% ຂອງຈຳນວນປະຊາກອນທັງໝົດໃນທ້າຍປີນີ້.