ສຳນັກຂ່າວ Bangkok Post ລາຍງານ: ລົດໄຟຂະບວນພິເສດຖ້ຽວທຳອິດ, ເລກທະບຽນ 971 ເຊິ່ງບັນທຸກຜູ້ປ່ວຍໂຄວິດ-19 ທີ່ມີອາການເລັກໜ້ອຍຫາປານກາງຈຳນວນ 135 ຊີວິດ ໄດ້ມຸ່ງໜ້າອອກຈາກສະຖານີລົດໄຟຣັງສິດ, ກຸງເທບມະຫານະຄອນ ໃນຕອນບ່າຍຂອງວັນທີ 28 ເພື່ອຈັດສົ່ງຜູ້ປ່ວຍໂຄວິດກັບບ້ານເກີດໃນບັນດາແຂວງທາງພາກຕາເວັນອອກສ່ຽງເໜືອຕອນລຸ່ມຂອງປະເທດໄທ.

ທ່ານ ອະນຸທິນ ຊານວິຣະກຸນ, ຮອງລັດຖະມົນຕີກະຊວງສາທາລະນະສຸກກ່າວວ່າ: ແຕ່ລະຕູ້ໂດຍສານຂອງລົດໄຟ ແມ່ນບັນຈຸຜູ້ປ່ວຍຈຳນວນ 36 ຄົນ ໂດຍມີການປະຕິບັດຕາມມາດຕະການຮັກສາໄລຍະຫ່າງ ພາຍໃຕ້ການດູແລຂອງທ່ານໝໍ ແລະ ພະຍາບານ 12 ຄົນທີ່ປະຈຳການຢູ່ໃນຂະບວນລົດໄຟ, ຂະນະທີ່ລົດໄຟຖ້ຽວນີ້ຈັດເປັນຂະບວນພິເສດຖ້ຽວທຳອິດ ເພື່ອຂົນສົ່ງກຸ່ມຜູ້ປ່ວຍໂຄວິດທີ່ຕ້ອງການເດີນທາງກັບບ້ານເກີດຂອງຕົນ.

ຢ່າງໃດກໍຕາມ, ບໍ່ມີການລາຍງານກ່ຽວກັບຄ່າໃຊ້ຈ່າຍໃນການຂົນສົ່ງນີ້ ເຊິ່ງລົດໄຟຂະບວນດັ່ງກ່າວມີກຳນົດຈັດສົ່ງຜູ້ປ່ວຍໂຄວິດທີ່ນະຄອນຣາດຊະສີມາ, ບູຣິຣັມ, ລຳຊີ ໃນສຸຣິນ, ໜອງແວງໃນສີສະເກດ, ແລະ ວາຣິນ ຊຳຣາບໃນແຂວງອຸບົນ ຣາດຊະທານີ.