ແຮງງານລາວທີ່ເດີນທາງກັບຄືນປະເທດກວ່າ 15 ເປີເຊັນ ຕິດໂຄວິດ-19 ພ້ອມເຂົ້າປິ່ນປົວທີ່ໂຮງໝໍຫຼາຍແຫ່ງໃນບັນດາແຂວງຕ່າງໆ ເຊິ່ງໄດ້ເພີ່ມຄວາມສ່ຽງທັງເປັນໄພຂົ່ມຂູ່ຕໍ່ການແຜ່ເຊື້ອ ແລະ ລະບາດເປັນວົງກວ້າງພາຍໃນປະເທດ.
ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ໄດ້ກ່າວໃນໂອກາດຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງວຽງຈັນມື້ນີ້ວ່າ: ສະພາບການລະບາດໃນຊຸມຊົນພາຍໃນປະເທດຂອງພວກເຮົາຫຼຸດຜ່ອນລົງ ກໍຍ້ອນມີມາດຕະການທີ່ເຂັ້ມງວດຂອງຄະນະສະເພາະກິດ ແລະ ການປະກອບສ່ວນຂອງທຸກພາກສ່ວນໃນສັງຄົມ ແຕ່ເຖິງປານນັ້ນ ພວກເຮົາຍັງມີຄວາມສ່ຽງສູງຕໍ່ການແຜ່ເຊື້ອ ເນື່ອງຈາກປັດຈຸບັນ ມີແຮງງານລາວເດີນທາງກັບຄືນປະເທດເປັນຈຳນວນຫຼາຍ. ໃນນັ້ນ, ຈາກການເກັບຕົວຢ່າງກວດຫາເຊື້ອພົບວ່າແຮງງານຈຳນວນດັ່ງກ່າວນັ້ນ ມີອັດຕາການຕິດເຊື້ອຫຼາຍກວ່າ 15%.
ທ່ານ ດຣ. ສະໜອງ ທອງຊະນະ ກ່າວຕື່ມວ່າ: ເມື່ອສະພາບເປັນເຊັ່ນນັ້ນ, ພວກເຮົາຈໍາເປັນຕ້ອງໄດ້ເອົາໃຈໃສ່ໃນດ້ານວຽກງານການກັ່ນຕອງ, ການກວດຫາເຊື້ອຢ່າງເຄັ່ງຄັດ ແລະ ຮຽກຮ້ອງໃຫ້ພໍໍ່ແມ່, ປະຊາຊົນ ຊ່ວຍເປັນຫູເປັນຕາໃນການລາຍງານເຈົ້າໜ້າທີ່ ເມື່ອພົບເຫັນຜູ້ທີ່ເດີນທາງເຂົົ້າມາລາວໂດຍບໍ່ຖືກຕ້ອງຕາມລະບຽບຫຼັກການ, ທັງນີ້ກໍເພື່ອຈະໄດ້ມີການເກັບຕົວຢ່າງ ແລະ ຈຳກັດບໍລິເວນ ເພື່ອຕັດວົງຈອນການລະບາດ ບໍ່ໃຫ້ແຜ່ລາມໄປສູ່ຊຸມຊົນ.
ປັດຈຸບັນ, ທາງຄະນະສະເພາະກິດຈະມີການສົມທົບ ແລະ ຊຸກຍູ້ໃຫ້ບັນດາແຂວງ ໃນການກະກຽມໂຮງໝໍພາກສະໜາມ ແລະ ສະຖານທີ່ຈຳກັດບໍລິເວນ ໂດຍສະເພາະ ບັນດາແຂວງທີ່ມີຊາຍແດນຕິດຈອດກັບປະເທດໃກ້ຄຽງ ເພື່ອຮອງຮັບແຮງງານລາວທີ່ເດີນທາງກັບຄືນປະເທດໃຫ້ພຽງພໍ.
