ເວັບໄຊ້ Thairath ໄດ້ລາຍງານເຖິງການເສຍຊີວິດຂອງແມ່ເຖົ້າຄົນໜຶ່ງທີ່ເສຍຊີວິດເມື່ອເດືອນມີນາທີ່ຜ່ານມາໃນປະເທດແບນຊິກ ໂດຍທີ່ຍັງບໍ່ທັນໄດ້ຮັບວັກຊີນໃດໆ ແມ່ເຖົ້າຄົນດັ່ງກ່າວຕິດເຊື້ອໂຄວິດ ແລະ ໄດ້ຮັບການປິ່ນປົວໃນໂຮງໝໍພຽງແຕ່ 5 ມື້ກໍເສຍຊີວິດ.

ຫຼັງຈາກທີ່ເສຍຊີວິດທາງເຈົ້າໜ້າທີ່ທາງການແພດໄດ້ເຂົ້າກວດສອບເພື່ອເບິ່ງວ່າເປັນການຕິດເຊື້ອສາຍພັນປະເພດໃດ ແລະ ໄດ້ພົບວ່າແມ່ເຖົ້າຄົນດັ່ງກ່າວນີ້ຕິດເຊື້ອໂຄວິດ-19 ສອງສາຍພັນພ້ອມກັນນັ້ນກໍຄືສາຍພັນອາລຟ້າ ແລະ ສາຍພັນເບຕາພ້ອມກັນ ໂດຍທາງທີມແພດໄດ້ຕັ້ງຂໍສົງໄສວ່າການຕິດເຊື້ອໂຄວິດຂອງແມ່ເຖົ້າຄົນນີ້ອາດຈະມາຈາກການຮັບເຊື້ອໂຄວິດ-19 ຈາກສອງຄົນທີ່ຕິດເຊື້ອສອງສາຍພັນແຕກຕ່າງກັນ ແຕ່ກໍຍັງບໍ່ທັນໄດ້ຮູ້ສາເຫດທີ່ແທ້ຈິງວ່າຕິດເຊື້ອມາຈາກບ່ອນໃດ ເຊິ່ງນັບວ່າເປັນຄົນທໍາອິດທີ່ມີຫຼັກຖານຢືນຢັນຊັດເຈນເຖິງການຕິດເຊື້ອພ້ອມກັນທັງສອງສາຍພັນໃນຄາວດຽວ ເຊິ່ງພົບໄດ້ຢາກແຕ່ກໍມີໂອກາດທີ່ຈະເກີດຂື້ນໄດ້ ໂດຍຈະມີການນໍາເຄສຂອງແມ່ເຖົ້າຄົນນີ້ເຂົ້າໃນເວທີປະຊຸມວິຊາການນານາຊາດກ່ຽວກັບໂລກຕິດຕໍ່ ແລະ ຈຸລະຊີວິທະຍາພາກພື້ນເອີຣົບຂອງປີນີ້.