Tokyo: ເນື່ອງຈາກຈຳນວນຜູ້ປ່ວຍໂຄວິດ-19 ເພີ່ມຂຶ້ນພາຍໃນປະເທດ ເປັນເຫດບີບໃຫ້ລັດຖະບານຍີ່ປຸ່ນຕັດສິນໃຈປະກາດສະຖານະການສຸກເສີນ ອັນໄດ້ກະທົບບໍ່ໜ້ອຍຕໍ່ການເຂົ້າຊົມງານແຂ່ງຂັນກີລາໂອລິມປິກເຊິ່ງຈະຈັດຂຶ້ນໃນນະຄອນຫຼວງໂຕກຽວໃນວັນທີ 23 ທີ່ຈະມາເຖິງນີ້.
ງານແຂ່ງຂັນກີລາໂອລິມປິກ ມີກຳນົດເລີ່ມວັນທີ 23 ກໍລະກົດຈົນເຖິງວັນທີ 8 ສິງຫາ ແຕ່ເນື່ອງຈາກຈຳນວນຜູ້ປ່ວຍໂຄວິດ-19 ພາຍໃນປະເທດມີທ່າອ່ຽງເພີ່ມຂຶ້ນ ເຮັດໃຫ້ລັດຖະບານຍີ່ປຸ່ນຈຳເປັນຕ້ອງປະກາດສະຖານະການສຸກເສີນ ເຊິ່ງຂະນະນີ້ທາງຄະນະຜູ້ຈັດງານກີລາໂອລິມປິກໄດ້ປະກາດຫ້າມບໍ່ໃຫ້ປະຊາຊົນເຂົ້າຊົມການແຂ່ງຂັນໃນພາກສະໜາມແລ້ວ.
ທ່ານ ໂຍຊິຮິເດະ ຊູກະ, ນາຍົກລັດຖະມົນຕີແຫ່ງປະເທດຍີ່ປຸ່ນກ່າວວ່າ: ສາຍພັນເດລຕ້າ ໄດ້ເປັນຕົວແປພາໃຫ້ເກີດມີການແຜ່ລະບາດຂອງໂຄວິດ-19 ພາຍໃນປະເທດຢ່າງວ່ອງໄວ, ແຕ່ເພື່ອເປັນການສະກັດກັ້ນການແຜ່ລະບາດຂອງສາຍພັນດັ່ງກ່າວບໍ່ໃຫ້ຂະຫຍາຍຕົວເປັນວົງກວ້າງ ຈິ່ງຈຳເປັນຕ້ອງມີການຍົກລະດັບມາດຕະການປ້ອງກັນ ແລະ ຄວບຄຸມໄວຣັສໂດຍດ່ວນ.
IOC ກ່າວວ່າ: ເຖິງແມ່ນຈະມີການປະກາດສະຖານະການສຸກເສີນ ແຕ່ກໍບໍ່ໝາຍຄວາມການແຂ່ງຂັນກີລາໂອລິມປິກຈະຢຸດຕິລົງ ແຕ່ສະຖານະການດັ່ງກ່າວອາດນຳໄປສູ່ຂໍ້ຈຳກັດທີ່ເຂັ້ມງວດສຳລັບຜູ້ເຂົ້າຊົມງານ ເຊິ່ງຄາດວ່າອາດມີຜູ້ເຂົ້າຊົມສູງເຖິງ 10 ພັນຄົນ ຫຼື ເຄິ່ງໜຶ່ງຂອງຄວາມຈຸທັງໝົດຂອງສະໜາມກີລາ.
ກ່ອນໜ້ານີ້ໄດ້ມີການສຳຫຼວດຄວາມເປັນໄປໄດ້ໃນການອະນຸຍາດໃຫ້ມວນຊົນທ້ອງຖິ່ນສາມາດເຂົ້າຊົມງານແຂ່ງຂັນກີລາໂອລິມປິກພາຍໃນສະໜາມ. ແຕ່ສະຖານະການສຸກເສີນທີ່ຈະດຳເນີນການຍາວຮອດ 6 ອາທິດນັ້ນ ເຮັດໃຫ້ແຜນການດັ່ງກ່າວຖືກຍົກເລີກ.
ທ່ານ ຍູຣິໂກະ ໂຄອິເກະ, ເຈົ້າຄອງນນະຄອນໂຕກຽວ ກ່າວວ່າ: ຫຼາຍຄົນຕ່າງກໍຕັ້ງໃຈລໍຖ້າຊົມງານແຂ່ງຂັນຄັ້ງຍິ່ງໃຫຍ່ນີ້ ແຕ່ແລ້ວກໍຕ້ອງຜິດຫວັງໄປຕາມໆກັນ ແຕ່ເພື່ອປ້ອງກັນບໍ່ໃຫ້ປັນຫາຈາກການແຜ່ລະບາດຂອງພະຍາດໂຄວິດທີ່ອາດຈະເກີດຂຶ້ນ, ຫວັງວ່າປະຊາຊົນຈະເຂົ້າໃຈ ແລະເຕັມໃຈທີ່ຈະນັ່ງຊົມງານແຂ່ງຂັນທາງໂທລະພາບໃນບ້ານເຮືອນຂອງໃຜລາວ.