ອີງຕາມການລາຍງານຂອງຫ້ອງການແຮງງານ ແລະ ສະຫວັດດີການສັງຄົມເມືອງ ໃນການເກັບຂໍ້ມູນຂອງຄະນະກໍາມະການປ້ອງກັນ ແລະ ຄວບຄຸມໄພພິບັດ ໃນຄັ້ງວັນທີ 08 ກໍລະກົດ 2021 ນີ້ວ່າ: ໃນວັນທີ 07 ກໍລະກົດ 2021 ເວລາ 13 ໂມງ 43 ນາທີ ເກີດແຜ່ນດິນໄຫວໂດຍມີຈຸດສູນກາງຢູ່ບ້ານ ດອກເກດ ເມືອງເງິນ ແຂວງໄຊຍະບູລີ ຈໍານວນ 1 ຄັ້ງ, ຄວາມແຮງສັ່ນສະເທື່ອວັດແທກໄດ້ 4.9 ຣິກເຕີ ເຊິ່ງມີຄວາມເລິກຈາກໜ້າດິນລົງໄປ 15 ກິໂລແມັດ, ຫ່າງຈາກຕົວເມືອງໄປທາງທິດເໜືອປະມານ 8 ກິໂລແມັດ ເຊິ່ງສ້າງຄວາມເສຍຫາຍ ແລະ ຄວາມແຕກຕື່ນໃຫ້ແກ່ຊາວເມືອງເງິນ.
ໂດຍເຫດການດັ່ງກ່າວສົ່ງຜົນກະທົບ 1 ບ້ານຄື: ບ້ານ ນາງົວ ເຮັດໃຫ້ເຮືອນປະຊາຊົນເສຍຫາຍ 1 ຫຼັງ ທີ່ມີຈໍານວນພົນ 4 ຄົນ, ຍິງ 2 ຄົນ ມູນຄ່າເສຍຫາຍທັງໝົດ 17 ລ້ານກີບ ສ່ວນບ້ານອື່ນແມ່ນມີຄວາມເສຍຫາຍເລັກໜ້ອຍ.
