ໃນເດືອນ ມິຖຸນາ ຢູ່ທີ່ລັດ Maharashtra ທາງພາກກາງຂອງປະເທດອິນເດຍ ໄດ້ມີເດັກນ້ອຍ 4 ຄົນເຂົ້າຮັບການປິ່ນປົວທີ່ໂຮງໝໍດ້ວຍອາການຫາຍໃຈຍາກ ແລະ ຄວາມດັນເລືອດຕໍ່າ ໂດຍກ່ອນໜ້ານີ້ແມ່ຂອງບັນດາເດັກນ້ອຍເຫຼົ່ານີ້ໄດ້ຕິດໂຄວິດ-19 ສ່ວນເດັກນ້ອຍທັງ 4 ຄົນແມ່ນບໍ່ມີອາການສະແດງອອກຂອງການຕິດໂຄວິດ ແຕ່ວ່າຜົນກວດພົບວ່າເດັກນ້ອຍເຫຼົ່ານັ້ນມີພູມຕ້ານທານຕໍ່ເຊື້ອໂຄວິດ-19 ເຊິ່ງເປັນສາເຫດບົ່ງຊີ້ວ່າເຄີຍຕິດໂຄວິດມາແລ້ວ.
ໃນຕອນນີ້ກຸ່ມເດັກນ້ອຍດັ່ງກ່າວກໍາລັງປະສົບບັນຫາທີ່ເປັນອັນຕະລາຍຕໍ່ກັບຊີວິດກໍຄື: ການອັກເສບຂອງອະໄວຍະວະຫຼາຍຢ່າງຢູ່ພາຍໃນຮ່າງກາຍຂອງເດັກນ້ອຍ ຫຼື Multi-system inflammatory syndrome ເຊິ່ງມັກຈະເກີດຂື້ນພາຍຫຼັງທີ່ເດັກນ້ອຍເຊົາຈາກພະຍາດໂຄວິດ-19 ປະມານ 4-5 ອາທິດ ແລະ ທາງພະແນກໝໍເດັກນ້ອຍຂອງປະເທດອິນເດຍກໍຍັງບໍ່ທັນຮູ້ຂໍ້ມູນຊັດເຈນວ່າເດັກນ້ອຍໃນປະເທດອິນເດຍມີຈັກຄົນທີ່ໄດ້ຮັບຜົນກະທົບຈາກພະຍາດນີ້.
ສໍາລັບສະຫະລັດອາເມລິກາໄດ້ພົບຜູ້ທີ່ມີອາການອະໄວຍະວະພາຍໃນອັກເສບໃນເດັກນ້ອຍຫຼາຍກວ່າ 3,742 ຄົນ ແລະ ເສຍຊີວິດແລ້ວ 35 ຄົນ. ໝໍບອກວ່າອາການນີ້ເປັນຜົນມາຈາກການຕອບສະໜອງທີ່ຮຸນແຮງຂອງລະບົບພູມຄຸ້ມກັນໃນຮ່າງກາຍທີ່ມີຕໍ່ເຊື້ອໄວຣັສໂຄໂຣນາ ເຊິ່ງອາດເຮັດໃຫ້ເກີດການອັກເສບຂອງອະໄວຍະວະທີ່ສໍາຄັນຫຼາຍພາກສ່ວນ ເຊິ່ງອາການກໍຈະຄ້າຍຄືກັບພະຍາດໆອື່ນເຊັ່ນ: ມີໄຂ້ສູງ, ມີຜື່ນຂຶ້ນຕາມຜິວໜັງ, ຕາແດງ, ຕ່ອມນໍ້າເຫຼືອງໃຫຍ່, ເຈັບທ້ອງ, ຄວາມດັນເລືອດຕໍ່າ ແລະ ປວດເມື່ອຍຕາມຮ່າງກາຍ ແລະ ໝໍໄດ້ບອກວ່າອາການທີ່ພົບໃນເດັກນ້ອຍອິນເດຍແມ່ນມີຄວາມແຕກຕ່າງກັນໃນແຕ່ລະຄົນ. ສ່ວນທາງສະຫະລັດອາເມລິກາຍັງພົບວ່າຜູ້ທີ່ປ່ວຍທີ່ເປັນພະຍາດດັ່ງກ່າວຍັງສະແດງອາການທີ່ກ່ຽວກັບລະບົບປະສາດ ແລະ ສະໝອງອີກດ້ວຍ.