BBC: ແອຣ໌ຄາຣ໌ (AirCar) ຍານພາຫະນະແບບປະສົມລະຫວ່າງລົດຍົນ ແລະ ເຄື່ອງບິນ ກຳລັງຢູ່ໃນຂັ້ນຕອນທົດລອງບິນກາງອາກາດ ໂດຍໃຊ້ເວລາ 35 ນາທີ ລະຫວ່າງສະໜາມບິນສາກົນ ໃນເມືອງນິທຣາ ແລະ ບຣາຕິສລາວາ ຂອງປະເທດສະໂລວາເກຍ.
ທ່ານ ສ.ຈ. ສະເຕຟານ ໄຄລນ໌ ຜູ້ສ້າງລົດບິນຄັນນີ້ກ່າວວ່າ: ລົດຄັນນີ້ສາມາດບິນໄດ້ປະມານ 1,000 ກິໂລແມັດ ດ້ວຍລະດັບຄວາມສູງເຖິງ 2,500 ແມັດ ເຊິ່ງປັດຈຸບັນມັນສາມາດໃຊ້ເວລາໃນການເດີນທາງກາງອາກາດດົນເຖິງ 40 ຊົ່ວໂມງ.
ລົດບິນໄດ້ປະເພດນີ້ມີສ່ວນປະກອບຂອງເຄື່ອງຈັກ ບີເອັມດັບເບິນຢູ (BMW) ແລະ ນໍ້າມັນເຊື້ອໄຟປົກກະຕິທົ່ວໄປ ໂດຍໃຊ້ເວລາ 2 ນາທີ 15 ວິນາທີໃນການແປງຈາກລົດຍົນເປັນເຄື່ອງບິນ ເຊິ່ງປີກນ້ອຍໆຈະຖືກພັບເກັບແນບໄວ້ຢູ່ຂ້າງລົດ.
ຊ່ວງເວລາທີ່ກຳລັງບິນຢູ່ເທິງອາກາດ, ຍານພາຫານະປະເພດນີ້ສາມາດເລັ່ງຄວາມໄວໄດ້ສູງເຖິງ 170 ກິໂລແມັດຕໍ່ຊົ່ວໂມງ, ເຊິ່ງບັນຈຸຜູ້ໂດຍສານໄດ້ສອງຄົນດ້ວຍນໍ້າໜັກຕົວລວມກັນບໍ່ເກີນ 200 ກິໂລກຼາມ. ຢ່າງໃດກໍຕາມ, ມັນບໍ່ສາມາດຂຶ້ນ ແລະ ລົງຕາມແນວດິ່ງໄດ້ ເຊິ່ງຈຳເປັນຕ້ອງໃຊ້ທາງຂຶ້ນ-ລົງຂອງເຄື່ອງບິນຢ່າງດຽວ.
ທ່ານ ດຣ. ສະຕີເຟນ ໄຣຕ໌ ນັກວິໄຈຜູ້ອາວຸໂສດ້ານເຄື່ອງບິນ ແລະ ເຕັກໂນໂລຢີ, ມະຫາວິທະຍາໄລເວສຕ໌ອອຟອິງແລນ (University of the West of England) ກ່າວວ່າ: ໃຜໆກໍສ້າງເຄື່ອງບິນໄດ້ ແຕ່ຈະເຮັດແນວໃດເພື່ອໃຫ້ມັນບິນດົນຫຼາຍລ້ານຊົ່ວໂມງ ໂດຍຮັບປະກັນຄວາມປອດໄພຂອງຜູ້ໂດຍສານ, ແຕ່ທ່ານກໍຄິດບໍ່ເຖິງເລີຍວ່າ ຍານພາຫະນະປະເພດນີ້ຈະຊ່ວຍປະຢັດລາຍຈ່າຍຂອງນໍ້າມັນເຊື້ອໄຟໄດ້ ເມື່ອທຽບກັບເຄື່ອງບິນແບບອື່ນ.
ຖືເປັນຄວາມຄາດຫວັງສູງພໍສົມຄວນໃນຕະຫຼາດລົດບິນໄດ້ ທີ່ກຳລັງທະຍອຍປະດິດຂຶ້ນໃນທົ່ວໂລກ ທີ່ຈະຊ່ວຍລົດຜ່ອນປັນຫາຄວາມແອອັດຂອງການຂົນສົ່ງທາງບົກທີ່ກຳລັງປະສົບໃນປັດຈຸບັນ ພາຍໃຕ້ວັດທະນະທຳສະໄໝນິຍົມທີ່ຖືກຈັບຕາມອງວ່າ ເປັນສັນຍະລັກແຫ່ງໂລກອະນາຄົດ.