ວັນທີ 22 ມິຖຸນາ 2021 ທີ່ຜ່ານມາ ສໍານັກຂ່າວ AFP ໄດ້ລາຍງານວ່ານາຍົກລັດຖະມົນຕີຂອງປະເທດເຢຍລະມັນໄດ້ເຂົ້າຮັບການສັກວັກຊີນປ້ອງກັນໂຄວິດ-19 ເຂັມທີ 2 ໂດຍເລືອກສັກວັກຊີນຍີ່ຫໍ້  Moderna ເຊິ່ງເປັນຄົນລະຍີ່ຫໍ້ກັບເຂັມທໍາອິດທີ່ໄດ້ສັກໂດຍເຂັມທໍາອິດແມ່ນສັກຂອງຍີ່ຫໍ້ Astrazeneca ໃນວັນທີ 16 ເມສາ 2021 ທີ່ຜ່ານມາ.

ປັດຈຸບັນໃນທົ່ວໂລກກໍາລັງມີການສຶກສາຄວາມເປັນໄປໄດ້ໃນການສັກວັກຊີນທີ່ມີຍີ່ຫໍ້ຕ່າງກັນ ໂດຍສະເພາະການເລືອກສັກວັກຊີນຊະນິດ mRNA ເປັນວັກຊີນເຂັມທີ 2 ເພື່ອເພີ່ມພູມຄຸ້ມກັນໃນການປ້ອງກັນເຊື້ອໂຄວິດ-19. ໃນຊ່ວງຕົ້ນເດືອນທີ່ຜ່ານມາ ມະຫາວິທະຍາໄລຊາລັນຂອງເຢຍລະມັນໄດ້ເປີດເຜີຍເຖິງການທົດສອບໃນເບື້ອງຕົ້ນວ່າ ການເລືອກສັກວັກຊີນແບບ Astrazeneca ແລະ Pfizer ສາມາດເພີ່ມພູມຄຸ້ມກັນໄດ້ພາຍຫຼັງສອງອາທິດທີສັກວັກຊີນ ເຊິ່ງເຮັດໃຫ້ພູມຄຸ້ມກັນຫຼາຍຂື້ນກວ່າການສັກ Astrazeneca 2 ເຂັມເຖິງ 10 ເທົ່າ ແຕ່ກໍຍັງເປັນການວິໄຈທີ່ຕ້ອງລໍຖ້າຜົນການສຶກສາເພີ່ມເຕີ່ມໃນຂັ້ນຕອນຕໍ່ໄປ.