ໃນວັນທີ 22 ມິຖຸນາ 2021 ທີ່ຜ່ານມາ ສໍານັກຂ່າວຕ່າງປະເທດໄດ້ລາຍງານວ່າ ສະຖາບັນຟິນເລທີ່ເປັນອົງກອນວິໄຈດ້ານວິທະຍາສາດແຖວໜ້າຂອງປະເທດກູບາຮ່ວມກັບສູນພັນວິສະວະກໍາ ແລະ ເທັກໂນໂລຊີແຫ່ງຊາດຂອງກູບາໄດ້ເປີດໂຕວັກຊີນປ້ອງກັນໂຄວິດ-19 ທີ່ພັດທະນາຂື້ນເອງໂດຍໃຊ້ໂປຣຕີນບາງສ່ວນຂອງເຊື້ອໄວຣັສໂຄໂຣນາເພື່ອກະຕຸ້ນສ້າງພູມຄຸ້ມກັນ ເຊິ່ງວັກຊີນທີ່ຜະລິດຂື້ນນີ້ມີຊື່ທາງເທັກນິກວ່າ CIGB-66 ແລະ ຊື່ທາງການຄ້າແມ່ນ ອັບດາລາ (ABDALA).

ທັງນີ້ຜົນການທົດສອບປະສິດທິພາບທາງດ້ານຄີນິກໃນໄລຍະທີ 3 ເຫັນວ່າວັກຊີນອັບດາລາ ຈະຕ້ອງສັກດ້ວຍກັນ 3 ເຂັມເຖິງຈະມີປະສິດທິພາບປ້ອງກັນ 92.28% ແລະປະເທດກູບາໄດ້ເລີ່ມສັກວັກຊີນໃຫ້ກັບປະຊາຊົນໃນເດືອນພຶດສະພາທີ່ຜ່ານມາເຊິ່ງເປັນວັກຊີນທີ່ຜະລິດເອງທັງໝົດ

ທ່ນປະທານາທິບໍດີຂອງກູບາໄດ້ຊົມເຊີຍເຖິງຄວາມກ້າວໜ້າຂອງການພັດທະນາວັກຊີນ ແລະ ປະເທດກູບາເອງກໍເປັນປະເທດໜຶ່ງທີ່ມີລະບົບການແພດ ແລະ ສາທາລະນະສຸກໄດ້ມາດຕະຖານສູງເປັນອັນດັບຕົ້ນໆຂອງໂລກ.