ລະບົບສາທາລະນະສຸກຂອງອິນເດຍຫຼົ້ມເຫຼວເນື່ອງຈາກຍອດຜູ້ຕິດເຊື້ອໂຄວິດ-19 ທີ່ເພີ່ມຂຶ້ນຈຳນວນຫຼາຍຕໍ່ມື້ ເຮັດໃຫ້ອົກຊີເຈນບໍ່ພຽງພໍຕໍ່ຈຳນວນຜູ້ປ່ວຍ ຈົນເຮັດໃຫ້ໂຮງໝໍຫຼາຍແຫ່ງບໍ່ສາມາດຮັກສາຜູ້ປ່ວຍໄດ້.

ພາບທີ່ເຫັນໃນເວລານີ້ທີ່ໜ້າໂຮງໝໍຫຼາຍແຫ່ງເຕັມໄປດ້ວຍຜູ້ປ່ວຍນອນຢູ່ໜ້າໂຮງໝໍຢ່າງໝົດຫວັງ, ໂດຍມື້ວານນີ້ອິນເດຍມີຜູ້ຕິດເຊື້ອກໍລະນີໃໝ່ 345,147 ຄົນ ແລະ ເສຍຊີວິດ 2,621 ຄົນ. ຍ້ອນຈຳນວນຜູ້ເສຍຊີວິດຈຳນວນຫຼາຍເຮັດໃຫ້ການເຜົາສົບ ແລະ ສະຖານທີ່ຝັງບໍ່ພຽງພໍ ທີ່ນະຄອນນິວເດລີສະຖານທີ່ເຜົາສົບບາງແຫ່ງຕ້ອງໃຊ້ບອນຈອດລົດເປັນບ່ອນເຜົາສົບລວມໝູ່ຊົ່ວຄາວ. ສຳລັບຍອດຜູ້ຕິດເຊື້ອສະສົມໃນອິນເດຍ 1,662,456 ຄົນ,​ເສຍຊີວິດ 189,549 ຄົນ.

ລັດຖະບານອິນເດຍກ່າວວ່າ ກຳລັງສະໜອງອຸປະກອນການແພດທັງທາງລົດໄຟ ແລະ ທາງອາກາດໃຫ້ແກ່ສະຖານທີ່ຮັກສາສຸຂະພາບໃນຂົງເຂດທີ່ພົບບັນຫາຮຸນແຮງ.

ໃນຂະນະທີ່ມື້ຄືນທີ່ຜ່ານມາລົດຕຳຫຼວດຕ້ອງໄດ້ຂັບນຳລົດທີ່ບັນທຸກອົກຊີເຈນຈາກລັດຖະບານໃຫ້ນຳອົກຊີເຈນມາເຕີມໃຫ້ກັບໂຮງໝໍ ບໍ່ດັ່ງນັ້ນໂຮງໝໍຈະຢຸດຕິການປິ່ນປົວຜູ້ປ່ວຍ.

ຮຽບຮຽງຂ່າວ: ພຸດສະດີ