ກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ ໄດ້ອອກແຈ້ງການໃຫ້ປິດສະຖານທີ່ບັນເທິງ, ຮ້ານຄາລາໂອເກະ, ຮ້ານກິນດື່ມ ແລະ ຫ້າມຈັດງານລ້ຽງໃນງານດອງ, ງານພົບປະສ້າງສັນ ທີ່ເຕົ້າໂຮມຄົນຫຼາຍນັບແຕ່ວັນທີ 14-30 ເມສາ 2021 ເພື່ອສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍເນື້ອໃນແຈ້ງການມີດັ່ງນີ້:
1. ໃຫ້ປິດຊົ່ວຄາວສະຖານທີ່ບັນເທີງ, ຮ້ານຄາລາໂອເກະ, ຮ້ານກິນດື່ມ ແລະ ຫ້າມຈັດງານລ້ຽງໃນງານດອງ, ງານພົບປະສ້າງສັນທີ່ເຕົ້າໂຮມຄົນຫຼາຍ. ນັບແຕ່ວັນທີ 14-30 ເມສາ 2021. ສຳລັບການຈັດງານດອງແມ່ນໃຫ້ຈັດຕາມປະເພນີອັນດີງາມແບບຄອບຄົວເທົ່ານັ້ນ.
2. ໃຫ້ພະແນກ ຖວທ ນະຄອນຫຼວງວຽງຈັນ, ແຂວງ ເປັນເຈົ້າການປະສານສົມທົບກັບກຳລັງປ້ອງກັນຄວາມສະຫງົບ ແລະຄະນະສະເພາະກິດນະຄອນຫຼວງ, ແຂວງ ເພື່ອຈັດຕັ້ງການເຄື່ອນໄຫວຕິດຕາມກວດກາຮ້ານບັນເທີງ, ຄາລາໂອເກະ, ຮ້ານກິນດື່ມແລະ ສະຖານທີ່ຈັດງານດອງ ຢ່າງເຂັ້ມງວດ.
3. ໃນກໍລະນີກວດພົບຜູ້ລະເມີດຕໍ່ແຈ້ງການ ຄັ້ງທຳອິດໃຫ້ກ່າວເຕືອນ ພ້ອມທັງເຮັດບົດບັນທຶກໄວ້ເປັນຫຼັກຖານ. ຫາກຍັງສືບຕໍ່ລະເມີດຕື່ມອີກ ແມ່ນໃຫ້ປິດທະບຽນ, ໃຫ້ປິດກິດຈະການ ພ້ອມທັງປັບໃໝຕາມລະບຽບການ.
4. ສ່ວນມາດຕະການດ້ານອື່ນໆ ທີ່ກ່ຽວຂ້ອງແມ່ນໃຫ້ປະຕິບັດຕາມແຈ້ງການຂອງຄະນະສະເພາະກິດເພື່ອປ້ອງກັນ, ຄວບຄຸມແລະ ແກ້ໄຂການລະບາດຂອງພະຍາດໂຄວິດ-19 ແລະ ຂອງຫ້ອງວ່າການສຳນັກງານນາຍົກລັດຖະມົນຕີ.
