ຢາສູບໄຟຟ້າ ຫຼື ຢາສູບ Electronic ເປັນໄພອັນຕະຫຼາຍທີ່ສຳຄັນໃນປັດຈຸບັນຂອງໄວລຸ້ນ ຈາກກົນລະຍຸກທາງການຕະຫຼາດເຊັ່ນ: ການໂຄສະນາທີ່ສ້າງໃຫ້ຢາສູບໄຟຟ້າບໍ່ເປັນອັນຕະລາຍຕໍ່ສຸຂະພາບ ເພາະບໍ່ມີໃບຢາສູບ ພ້ອມຍັງສ້າງພາບໃຫ້ຄົນສູບຢາສູບໄຟຟ້ານັ້ນ ເປັນຄົນທັນສະໄໝ ແຕ່ໃນຄວາມເປັນຈິງພັດພົບວ່າ: ຢາສູບໄຟຟ້າ ມີສານນິໂຄຕິນປົນຢູ່ປະລິມານຫຼາຍ ແລະ ສາມາດເຂົ້າສູ່ຮ່າງກາຍຂອງຜູ້ສູບໄດ້ເຖິງ 5 – 9 ເທົ່າ ຂຶ້ນຢູ່ກັບປະລິມານນິໂຄຕິນ ທີ່ຢູ່ໃນຢາສູບໄຟຟ້າ ສະນັ້ນ, ບອກໄດ້ວ່າ ນິໂຄຕິນທີ່ມີປະລິມານຫຼາຍກວ່າຢາສູບທຳມະດາ ກໍ່ລ້ວນແລ້ວແຕ່ທຳລາຍສຸຂະພາບຂອງຜູ້ສູບໄດ້ຫຼາຍເຊັ່ນກັນ.
ຢາສູບໄຟຟ້າສົ່ງຜົນເສຍຕໍ່ຮ່າງກາຍຄື: ສະໝອງມືນງົງ, ກະຕຸ້ນອັດຕາການເຮັດວຽກຂອງຫົວໃຈເພີ່ມຂຶ້ນ ເກີດພາວະຫົວໃຈວາຍ, ຫົວໃຈເຮັດວຽກໜັກ, ເສັ້ນເລືອດຫົດໂຕສົ່ງຜົນໃຫ້ເກີດຄວາມດັນເລືອດສູງຂື້ນ, ເສັ້ນເລືອດໃນສະໝອງແຕກ, ບັນຫາຕໍ່ລະບົບທາງເດີນຫາຍໃຈ, ຫາຍໃຈໄວ ສ່ຽງຕໍ່ການເປັນມະເຮັງປອດ ມີຄວາມຜິດປົກຕິທາງອາລົມ, ສະມາທິ ແລະ ເກີດບັນຫາໃນລະບົບພູມຄຸ້ມກັນຂອງຮ່າງກາຍເປັນຕົ້ນ ຖ້າຫາກສູບຕໍ່ເນື່ອງໃນໄລຍະຍາວ.
ທຸກຄົນຄວນຮູ້ເທົ່າທັນກົນລະຍຸດທາງການຕະຫຼາດ ແລະ ຜົນກະທົບຕໍ່ສຸຂະພາບຂອງຢາສູບໄຟຟ້າ ເພາະເປັນສິ່ງທີ່ນິຍົມໃນກຸ່ມໄວລຸ້ນປັດຈຸບັນ.