ກອງບັນຊາການ ປກສ ນະຄອນຫຼວງວຽງຈັນ ແຈ້ງການ ເມື່ອວັນທີ 1 ເມສາ 2021 ເພື່ອຮັບປະກັນໃຫ້ແກ່ການສະເຫຼີມສະຫຼອງບຸນປີໃໝ່ລາວ ແຕ່ວັນທີ 14-16 ເມສາ 2021 ທີ່ ຈະໝູນວຽນມາເຖີງນີ້, ເປັນໂອກາດຫນື່ງທີ່ສໍາຄັນໃນການສືບຕໍ່ເສີມຂະຫຍາຍມູນເຊື້ອຮີດຄອງປະເພນີອັນດີງາມ ແລະ ຄວາມສາມັກຄີເປັນປຶກແຜ່ນຂອງຄົນລາວດັ່ງນັ້ນ, ກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ, ຈິ່ງໄດ້ອອກບັນດາຂໍ້ຫ້າມ ດັ່ງນີ້:
- ຫ້າມບໍ່ໃຫ້ຊື້-ຂາຍສິນຄ້າທີ່ກໍ່ໃຫ້ເກີດສຽງແຕກທຸກປະເພດ, ບໍ່ໃຫ້ຈູດໝາກກະໂພກ,ບັ້ງໄຟດອກທຸກຊະນິດ,ບໍ່ໃຫ້ນຳໃຊ້ທາດລະເບີດ,ທາດແຕກ,ທາດເບື່ອ-ເຄມີ, ທາດກຳມະລັງສີ ແລະ ວັດຖຸອອກລິດຕໍ່ສຸຂະພາບ.
- ຫ້າມໃຊ້ພາຫະນະບັນຈຸຖັງນໍ້າ, ຄຸນໍ້າ ຫຼື ທໍ່ຢາງຕໍ່ນໍ້າຈາກເຮືອນອອກມາ ເພື່ອຫົດສົງນໍ້າຄົນໃຊ້ຖະໜົນ ແລະ ຫ້າມລວມຕົວກັນເປັນກຸ່ມເຕັ້ນຟ້ອນຕາມທ້ອງຖະໜົນເດັດຂາດ.
- ຫ້າມບໍ່ໃຫ້ລົງຫຼິ້ນນໍ້າຢູ່ຫາດຊາຍນໍ້າຂອງທີ່ບໍ່ໄດ້ຮັບອະນຸຍາດເດັດຂາດ ຫຼື ບ່ອນທີ່ບໍ່ມີເຈົ້າໜ້າທີ່ປ້ອງກັນຮັັກສາຄວາມສະຫງົບ.
- ຫ້າມບໍ່ໃຫ້ໃຊ້ນໍ້າເປື້ອນ, ນໍ້າສີ, ນໍ້າປົນພິດທີ່ຄັນຄາຍ, ນໍ້າກ້ອນໃສ່ຖົງຫົດ ຫຼື ແກ່ວງໃສ່ກັນ,ບໍ່ໃຫ້ນຸ່ງເຄື່ອງສັ້ນ-ເຂີນ ຍົ້ວຍວນ ທີ່ບໍ່ຖືກຕາມຮີດຄອງປະເພນີ, ການທ່ຽວຫຼິ້ນແບບລາມົກອານາຈານ ຫຼື ຫຼິ້ນການພະນັນທຸກປະເພດ.
- ຫ້າມເປີດສຽງດັງເນືອງເກີນເຫດ, ບໍ່ໃຫ້ໃຊ້ພາຫະນະແຫ່ຄົບງັນຕາມທ້ອງຖະໜົນ, ບໍ່ຂີ້ລົດເປັນພຶງເປັນແພ-ແລ່ນໄວເກີນຂອບເຂດ, ດື່ມສິ່ງມຶນເມົາແລ້ວບໍ່ຄວນຂັບລົດເດັດຂາດ.
- ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາຂັບຂີ່ໄປຕາມທ້ອງຖະໜົນ, ລົດບັນທຸກໜັກ-ລົດໂດຍສານບໍ່ຄວນໃສ່ເກີນຂະໜາດ.
- ບັນດາຮ້ານບັນເທີງ, ຮ້ານກິນດື່ມໃຫ້ປະຕິບັດຕາມແຈ້ງການ, ຄຳສັ່ງຂອງລັດຖະບານວາງອອກຢ່າງເຂັ້ມງວດ.
- ຫ້າມຫົດນໍ້າໃສ່ເຈົ້າໜ້າທີ່ທີ່ກຳລັງປະຕິບັດໜ້າທີ່ຮັກສາຄວາມເປັນລະບຽບຮຽບຮ້ອຍຕາມເສັ້ນທາງ ແລະ ສະຖານທີ່ຕ່າງໆ.
ຕໍ່ຜູ້ທີ່ລະເມີດຈະຖືກສຶກສາອົບຮົມ, ກ່າວເຕືອນ, ປັບໃໝຕາມສະຖານການລະເມີດ ຫຼື ດຳເນີນຄະດີຕໍ່ຜູ້ກະທຳຜິດສ່ວນບຸກຄົນໂດຍປະສານສົມທົບກັບທຸກພາກສ່ວນທີ່ກ່ຽວຂ້ອງເພື່ອປະຕິບັດຕາມລະບຽບກົດໝາຍ.
ຮຽບຮຽງຂ່າວ: ພຸດສະດີ