ທ່ານ ປູຕີນ ປະທານາທິບໍດີຣັດເຊຍ ໄດ້ລົງນາມໃນຮ່າງກົດໝາຍສະບັບສຸດທ້າຍ, ເພື່ອເຮັດໃຫ້ການດຳລົງຕຳແໜ່ງກ່ອນໜ້ານີ້ ບໍ່ຂັດຄ້ອງຕໍ່ຄຸນສົມບັດ ຖ້າຫາກວ່າຈະລົງເລືອກຕັ້ງໃນ 2 ສະໄໝ ຕໍ່ໄປ.
ໃນວັນທີ 5 ເມສາ 2021, ສຳນັກຂ່າວ AFP (AFP) ລາຍງານວ່າ: ທ່ານ ປູຕິນ ປະທານາທິບໍດີຣັດເຊຍ ໄດ້ລົງນາມເພື່ອບັງຄັບໃຊ້ກົດໝາຍສຳລັບການຕໍ່ອາຍຸໃຫ້ຕົນເອງ ສາມາດດຳລົງຕຳແໜ່ງ ປະທານາທິບໍດີ ໄດ້ອີກ 2 ສະໄໝ, ກ່ອນທີ່ວາລະປັດຈຸບັນຈະໝົດລົງໃນ 3 ປີຂ້າງໜ້ານີ້.
ຮ່າງກົດໝາຍດັ່ງກ່າວມີຂື້ນ ຫຼັງຈາກທີ່ຣັດເຊຍເປີດໃຫ້ປະຊາຊົນລົງມະຕິ ໃນທ້າຍເດືອນມິຖຸນາ ຫາ ຕົ້ນເດືອນກໍລະກົດ ປີກາຍນີ້. ໜຶ່ງໃນນັ້ນ, ແມ່ນຂໍ້ສະເໜີໃຫ້ຕັດຄຳວ່າ “ ຕິດຕໍ່ກັນ” ໃນໝວດທີ່ກ່ຽວຂ້ອງກັບຂໍ້ຈຳກັດ ຂອງວາລະການດຳລົງຕຳແໜ່ງປະທານາທິບໍດີ ອອກໄປ ແລະ ເຮັດໃຫ້ການດຳລົງຕຳແໜ່ງປະທານາທິບໍດີ ຂອງ ທ່ານ ປູຕິນ ກ່ອນໜ້ານີ້ ຖືກເລີ່ມໃໝ່ທັນທີເມື່ອມີການປັບປຸງ.
ຈາກເຫດຜົນເຫຼົ່ານີ້ ເຮັດໃຫ້ການດຳລົງຕຳແໜ່ງ ຂອງ ທ່ານ ປູຕິນ ກ່ອນໜ້ານີ້ ໃນປີ 2000-2008 ແລະ 2012- ປັດຈຸບັນ ຈະບໍ່ໄດ້ຮັບການປະເມີນຜົນ ຖ້າຫາກ ທ່ານ ປູຕິນ ຕັດສິນໃຈລົງສະໝັກຮັບເລືອກຕັ້ງຄັ້ງໜ້າ.
ໝາຍຄວາມວ່າ: ທ່ານ ປູຕິນ ຈະສາມາດລົງເລືອກຕັ້ງ ໄດ້ອີກ 2 ສະໄໝ, 1 ສະໄໝມີອາຍຸການ 6 ປີ, ເຮັດໃຫ້ ທ່ານ ປູຕິນ ໃນອາຍຸ 68 ປີ ມີໂອກາດຈະດຳລົງຕຳແໜ່ງ ຈົນເຖິງ ປີ 2036 ຖ້າຖືກເລືອກຕັ້ງທັງສອງສະໄໝ, ເຊິ່ງຈະເຮັດໃຫ້ລາວສາມາດນຳພາປະເທດໄດ້ຈົນກວ່າຈະຮອດອາຍຸໄດ້ 83 ປີ.