ໃນວັນທີ 24 ມີນາ 2021 ທີ່ຜ່ານມາ ສໍານັກຂ່າວຕ່າງປະເທດໄດ້ລາຍງານວ່າເກີດເຫດໄຟໄໝ້ຢ່າງຮຸນແຮງໃນຄ້າຍອົບພະຍົບຄ໋ອກບາຊ່າ ໃນປະເທດບັງກລາເທດ ເຮັດໃຫ້ມີຜູ້ເສຍຊີວິດຢ່າງຕໍ່າ 15 ຄົນ, ມີຜູ້ໄດ້ຮັບບາດເຈັບ ແລະ ສູນຫາຍເກືອບ 1,000 ຄົນ. ເຊິ່ງເຫດການດັ່ງກ່າວໄດ້ເຮັດໃຫ້ບ້ານພັກເສຍຫາຍຫຼາຍກວ່າ 17,000 ຫຼັງຄາ.

ສໍານັກງານຜູ້ແທນເພື່ອຜູ້ລີ້ໄພແຫ່ງສະຫະປະຊາຊາດໄດ້ເປີດເຜີຍວ່າເຫດການດັ່ງກ່າວເຮັດໃຫ້ຜູ້ອົບພະຍົບຫຼາຍກວ່າ 45,000 ຄົນບໍ່ມີທີ່ຢູ່ອາໄສ ໂດຍເຈົ້າໜ້າທີ່ລະບຸວ່າເຫດການໄຟໄໝ້ດັ່ງກ່າວກິນພື້ນທີ່ໃນຄ້າຍຂອງຜູ້ອົບພະຍົບເຖິງ 4 ສ່ວນ ເຊິ່ງເປັນທີ່ຢູ່ອາໄສຂອງຜູ້ອົບພະຍົບປະມານ 124,000 ຄົນ ແລະ ເຫດການໄຟໄໝ້ໃນຄັ້ງນີ້ເຈົ້າໜ້າທີ່ສືບສວນຂອງປະເທດບັງກລາເທດບອກວ່າເກີດຈາກການທີ່ຖັງແກັສລະເບີດແລ້ວເຮັດໃຫ້ໄຟໄໝ້ຢ່າງໄວວາ.