ກາຍເປັນປະເດັນຮ້ອນຂຶ້ນມາທັນທີຫຼັງຈາກ ນັກອອກແບບຊຸດ “ຄຳພີ ອະລັງການ” ໄດ້ເປີດຕົວຊຸດປະຈຳຊາດ ມິສແກຣນລາວ 2020 “ຊຸດປາກັດລາວ” ໃນວັນທີ 20 ມີນາ 2021 ທີ່ຜ່ານມາ ເຊິ່ງມີຫຼາຍຄົນທັກທ້ວງວ່າຊຸດດັ່ງກ່າວ ຄ້າຍກັບ “ຊຸດປາກັດໄທ” ທີ່ຈະໃຫ້ ມິສຢູນິເວີສໄທແລນ 2020 ໃສ່ປະກວດ.
ຫຼ້າສຸດ, ໃນວັນທີ 21 ມີນາ ທີ່ຜ່ານມາ ກອງປະກວດ Miss Universe Thailand ໄດ້ອອກມາເຄື່ອນໄຫວໂດຍກ່າວວ່າ: ຊຸດປະຈຳຊາດ “ຊດປາກັດໄທ” (ຊດໄຕຣົງອະນົງນາດສຸພັນມັດສາ) ຢືນຢັນວ່າໄດ້ເປີດຕົວຊດນີ້ຕັ້ງແຕ່ 2020.
ຈາກນັ້ນທາງບໍລິສັດ ທີພີເອັນ ໂກລບອລ ຈຳກັດ ຜູ້ຖືລິຂະສິດການຈັດການປະກວດ Miss Universe Thailand ໄດ້ປະກາດຊດປະຈຳຊາດໄທ “ຊຸດປາກັດໄທ” ເຊິ່ງພ້ອມກຽມໃຫ້ ນາງ ອາແມນດ້າ ຊາລິສາ ອອບດັມ ໃສ່ປະກວດໃນເວທີ ມິສຢູນີເວີດສ໌ ຄັ້ງທີ 69 ທີ່ລັດຟໍລິດາ ປະເທດອາເມລິກາ.
ຕໍ່ຈາກປະເດັນດັ່ງກ່າວ ທາງດ້ານ ທ້າວ ຄຳພີ ອະລັງການ ນັກອອກແບບຊຸດປະຈຳຊາດລາວ ໃຫ້ເວທີ ມິສແກຣນລາວ 2020 ໄດ້ກ່າວໃຫ້ສຳພາດຕໍ່ທີມຂ່າວຊ່ອງ 3 ວ່າ “ຄວາມຈິງແລ້ວຊດປາກັດລາວ ໄດ້ຖືກອອກແບບຕັ້ງແຕ່ປີ 2019 ໃຫ້ກັບມິສແກຣນລາວ ແຕ່ໃນປີນັ້ນລາວບໍ່ໄດ້ສົ່ງນາງງາມເຂົ້າປະກວດເວທີມິສແກຣນ 2019 ທີ່ປະເທດເວເນຊູເອລາ ເປັນເຈົ້າພາບຈັດ ຈິ່ງໄດ້ເກັບຄອນເຊັບຊດໄວ້ແລ້ວນຳກັບມາໃຊ້ໃນປີນີ້ ດັ່ງນັ້ນ, ຄອນເຊັບຊຸດປາກັດລາວແມ່ນມີມາຕັ້ງແຕ່ປີ 2019 ແລ້ວ”.
ສຳລັບປະເດັນເລື່ອງຊຸດ ທາງກອງປະກວດມິສແກຣນລາວ ຍັງບໍ່ທັນອອກມາສະແດງທ່າທີວ່າຈະຈັດການແບບໃດໃນເລື່ອງນີ້ ຈະມີການປ່ຽນຊຸດປະຈຳຊາດລາວໃໝ່ ຫຼື ບໍ່ແມ່ນຕ້ອງໄດ້ລໍຖ້າການຖະແຫຼງການຈາກທາງກອງປະກວດ ເຊິ່ງປັດຈຸບັດ, ນາງ ພັດທະນາ ກິດດາພອນ ມິສແກຣນລາວ 2020 ກຳລັງດຳເນີນການປະກວດ ທີ່ປະເທດໄທ.
ຮຽບຮຽງຂ່າວ: ພຸຸດສະດີ