ສະຫຼຸບເປັນທີ່ຮຽບຮ້ອຍແລ້ວ ກັບການປະກາດ ມິສຢູນິເວີສລາວ 2020 (Miss Universe Laos) ເຊິ່ງຈະກາຍເປັນຕົວແທນຂອງປະເທດເພື່ອໄປປະກວດ Miss Universe 2020 ທີ່ ສະຫະລັດອາເມລິກາ ໂດຍເຈົ້າຂອງມົງກຸດຄົນທີ 4 ນັ້ນກໍ່ໄດ້ແກ່ ຄຣິດຕິນາ ລາຊະສິມມາ ເຊິ່ງຫຼາຍຄົນນັ້ນກໍ່ຄຸ້ນໜ້າຄຸ້ນຕາເປັນຢ່າງດີໃນວົງການບັນເທີງລາວ.
ການປະກາດແຕ່ງຕັ້ງຜູ້ໄດ້ຮັບຕຳແໜ່ງ ມິສຢູນິເວີສລາວ 2020 ປະກາດຂຶ້ນໃນວັນທີ 18 ມີນາ 2021 ໂດຍປີນີ້ບໍ່ມີການຈັດກອງປະກວດ ແລະ ຊື່ຂອງຄຣິດຕິນາ ກໍ່ຖືກກ່າວເຖິງຜ່ານຫຼາຍໆສື່ວ່າຈະໄດ້ຮັບຕຳແໜ່ງ ຈົນສຸດທ້າຍກໍແມ່ນແທ້.
ຄຣິດຕິນາ ເຂົ້າສູ່ວົງການບັນເທິງດ້ວຍການປະກວດ MISS LAO 2012 ພ້ອມທັງໄດ້ຮັບຕຳແໜງໃນຄັ້ງນັ້ນດ້ວຍ ນອກນັ້ນ ຍັງໄດ້ເຂົ້າສູ່ວົງການນາງແບບຂອງລາວຕັ້ງແຕ່ນັ້ນມາ ຈົນຮອດປະຈຸບັນ. ສ່ວນເສັ້ນທາງຂອງການກ້າວຂືຶ້ນສູ່ການໄດ້ຮັບຕຳແໜ່ງມິສຢູນິເວີສລາວ 2020 ນັ້ນ ກໍ່ບໍ່ແມ່ນເລື່ອງງ່າຍເຊັ່ນດຽວກັນ ເພາະ ຄຣິດຕິນາ ມີຄວາມຕັ້ງໃຈເຂົ້າຊີງມົງກຸດຂອງມິສຢູນິເວີສລາວຕັ້ງແຕ່ປີ 2019 ແລ້ວ ແຕ່ໃນຄັ້ງນັ້ນກໍ່ຕ້ອງພາດໂອກາດໄປ ເພາະເດີນທາງກັບປະເທດລາວເພື່ອສະໝັກເຂົ້າປະກວດຄັ້ງນັ້ນບໍ່ທັນ ເນື່ອງຈາກຕິດພາລະກິດຫຼາຍໆຢ່າງທີ່ຍັງບໍ່ລົງໂຕ ລວມເຖິງກອງປະກວດກໍ່ມີການປັບປ່ຽນກຳນົດຮັບສະໝັກແບບກະທັນຫັນ.
ໃນນາມສຳນັກຂ່າວ ລາວໂພສ ຂໍສະແດງຄວາມຍິນດີ ມາຍັງ ຄຣິດຕິນາ ລາຊະສິມມາ ທີ່ໄດ້ເປັນໂຕແທນໃນການປະກວດມິສຢູນິເວີສ 2020 ໃນເວທີລະດັບໂລກ ເພາະໝາຍເຖິງການຕາງໜ້າທີ່ຈະນໍຳເອົາຄວາມເປັນລາວໄປສະແດງເທິງເວທີສາກົນ.