ເຈົ້າໜ້າທີ່ຂອງອາເມລິກາເປີດເຜີຍເມື່ອວັນທີ 12 ມີນາ 2021 ວ່າ: ລັດຖະບານຈະກັກຕຸນວັນຊີນປ້ອງກັນໂຄວິດ-19 ທີ່ຜະລິດໂດຍບໍລິສັດແອສຕຣ້າເຊນເນກ້າໄວ້ ເຖິງແມ່ນວ່າວັກຊີນດັ່ງກ່າວຈະບໍ່ໄດ້ຮັບການອະນຸມັດໃຫ້ໃຊ້ໃນອາເມລິກາກໍ່ຕາມ ເຊິ່ງເປັນການປະຕິເສດແຮງກົດດັນຈາກເອຣົບ ແລະ ຈາກແອສຕຣ້າເຊນເນກ້າທີ່ຈະໃຫ້ອາເມລິກາພິຈາລະນາແບ່ງປັນວັກຊີນດັ່ງກ່າວ.
ວັກຊີນປ້ອງກັນໂຣກໂຄວິດ-19 ຂອງແອສຕຣ້າເຊນເນກ້າຍັງບໍ່ໄດ້ຮັບອະນຸມັດໃນອາເມລິກາ ແຕ່ແອສຕຣ້າເຊນເນກ້າກໍ່ໄດ້ເລີ່ມຜະລິດວັກຊີນດັ່ງກ່າວແລ້ວໃນອາເມລິກາ ເພື່ອທີ່ຈະສົ່ງມອບວັກຊີນຈຳນວນ 300 ລ້ານໂດສຕາມທີ່ລັດຖະບານອາເມລິກາໄດ້ສັ່ງຊື້ໄວ້ໃນປີທີ່ຜ່ານມາ.
AstraZeneca ໄດ້ຮຽກຮ້ອງໃຫ້ປະທານາທິບໍດີ ໄບເດນ ພິຈາລະນາແບ່ງປັນວັກຊີນປ້ອງກັນໂຄວິດ-19 ຂອງບໍລິສັດທີ່ທາງອາເມລິກາມີຢູ່ໃຫ້ກັບສະຫະພາບເອີຣົບ (EU), ເຊິ່ງຫຼາຍປະເທດປະສົບກັບຄວາມຫຍຸ້ງຍາກ ແລະ ໄດ້ມີການອະນຸມັດໃຊ້ວັກຊີນດັ່ງກ່າວແລ້ວ ແຕ່ທ່ານ ໄບເດນ ແລະ ລັດຖະບານອາເມລິກາຢືນຢັນວ່າຈະໃຫ້ຄວາມສຳຄັນກັບປະຊາຊົນອາເມລິກາກ່ອນ.
ຮຽບຮຽງຂ່າວ: ພຸດສະດີ