ລັດຖະບານທະຫານຂອງມຽນມາປະກາດ “ກົດໄອຍະການເສິກເຕັມຮູບແບບ” ເມື່ອຕອນເດິກຂອງວັນທີ 14 ມີນາ 2021 ໂດຍປະກາດໃຊ້ໃນບາງພື້ນທີ່ຂອງຢາງກຸ້ງ ເຊິ່ງເປັນເມືອງຫຼວງການຄາຫຼັງຈາກການປະທະເຮັດໃຫ້ມີຜູ້ເສຍຊີວິດຫຼາຍຂຶ້ນ ແລະ ໂຮງງານຈີນໃນມຽນມາຖືກຈູດ.
ຄຳສັ່ງກົດໄອຍະການເສິກມີຜົນບັງຄັບໃຊ້ກັບສອງເມືອງທີ່ມີປະຊາຊົນໜາແໜ້ນໃນຢ່າງກຸ້ງໄດ້ແກ່ ເຂດແລງຕາຍາ ແລະ ເຂດຊະເວ ປະຍີ ຕາ ມາດຕະການນີ້ໃຫ້ອຳນາດຜູ້ບັນຊາການກອງທັບເຂດຢ່າງກຸ້ງສາມາດໃຊ້ອຳນາດໄດ້ເພື່ອ “ເຮັດທຸງຄວາມປອດໄພຫຼັກນິຕິທຳ ແລະ ສັນຕິພາຍໄດ້ຢ່າງມີປະສິດທິພາບຫຼາຍຂຶ້ນ”.
ສຳນັກຂ່າວຣອຍເຕີລາຍງານວ່າ ຈີນຮຽກຮ້ອງໃຫ້ມຽນມາຢຸດຕິຄວາມຮຸນແຮງ ແລະ ປົກປ້ອງບໍລິສັດ ແລະ ບຸກຄະລາກອນຂອງຈີນຫຼັງຈາກເກີດເຫດການໂຈມຕີໂຮງງານທີ່ໄດ້ຮັບການສະໜັບສະໜູນທາງການເງິນຈາກຈີນທີ່ມຽນມາ.
ດ້ານສຳນັກຂ່າວ Eleven Media Group ໃນມຽນມາລາຍງານວ່າ ເກີດໄຟໄໝ້ທີ່ໂຮງງານຜະລິດເສື້ອຜ້າຫຼາຍແຫ່ງໃນເຂດຕາຍາ ແລະ ເຂດຊະເວປະຍີຕາ.
ໃນເຂດແລງຕາຍາເກີດໄຟໝ້ໂຮງງານຜະລິດເສື້ອຜ້າ Wai Kyal ໂຮງງານປຸ໋ຍ Shwe Na Gar ລວມເຖິງໂຮງງານຕັດຫຍິບເສື້ອຜ້າອື່ນໆ ອີກຫຼາຍແຫ່ງ ແລະ ສາງເກັບສິນຄ້າ ສ່ວນໃນເຂດຊະເວປະຍີຕາ ເກີດໄຟໄໝ້ຂຶ້ນທີ່ໂຮງງານຜະລິດເສື້ອ Myanmar Solar Moda.
ຫຼັງຈາກການກໍ່ລັດຖະປະຫານຂອງກອງທັບມຽນມາໄດ້ເກີດກະແສຕໍ່ຕ້ານປະເທດຈີນຫຼາຍຂຶ້ນເນື່ອງຈາກປະຊາຊົນມຽນມາເຂົ້າໃຈວ່າຈີນຢູ່ເບື້ອງຫຼັງ ຫຼື ສະໜັບສະໜູນການເຮັດລັດຖະປະຫານ ແລະ ບາງສ່ວນບໍ່ພໍໃຈຈີນທີ່ບໍ່ສະແດງທ່າທີຄັດຄ້ານ ຫຼື ປະນາມການເຮັດລັດຖະປະຫານໃນກອງປະຊຸມສະມັດຊາໃຫຍ່ສະຫະປະຊາຊາດ.
ຮຽບຮຽງຂ່າວ: ພຸດສະດີ