ປະຊາຊົນມຽນມາຫຼາຍສິບພັນຄົນສືບຕໍ່ເດີນຂະບວນຕາມຖະໜົນເພື່ອປະທ້ວງລັດຖະປະຫານ ເຖິງວ່າຈະມີເຫດການກໍ່ຄວາມຮຸນແຮງຈາກເຈົ້າໜ້າທີ່ຕຳຫຼວດ, ທະຫານ ແລະ ມີຜູ້ເສຍຊີວິດຫຼາຍສິບຄົນ ແລະ ການບຸກລຸກຢ່າງຮຸນແຮງຂອງນັກເຄື່ອນໄຫວເພື່ອປະຊາທິປະໄຕໃນຕອນກາງຄືນ.
ໃນການປະທ້ວງຂອງມຽນມາໃນມື້ວັນທີ 7 ມີນາ 2021, ເຈົ້າໜ້າທີ່ໄດ້ເລີ່ມຂັບໄລ່ຜູ້ປະທ້ວງໂດຍໃຊ້ແກ໊ສນໍ້າຕາ ແລະ ລະເບີດມືກັບຜູ້ປະທ້ວງໃນເມືອງລ່າສ້ຽວໃນລັດສານຂອງມຽນມາ ພ້ອມມີການລະດົມຍິງປືນໃສ່ຜູ້ປະທ້ວງໃນເມືອງ ພຸກາມ ໂດຍສຳນັກຂ່າວຣອຍເຕີ ໂດຍອີງຕາມການຖ່າຍທອດສົດຈາກເຫດການຂອງຜູ້ໃຊ້ເຟສບຸກບອກວ່າຍັງບໍ່ສາມາດລະບຸໄດ້ວ່າເປັນການໃຊ້ລູກປືນແທ້ ຫຼື ລູກປືນປອມ ແລະ ຍັງບໍ່ມີລາຍງານການເສຍຊີວິດຈາກການສະຫຼາຍການປະທ້ວງໃນຄັ້ງນີ້.
ຮ້ານຄ້າ, ໂຮງງານ ແລະ ທະນາຄານ ໃນນະຄອນຢາງກຸ້ງ ຮ່ວມໃຈກັນປິດໃຫ້ບໍລິການເມື່ອວັນທີ 8 ມີນາ ທີ່ຜ່ານມາ ຫຼັງຈາກສະຫະພາບການຄ້າລາຍໃຫຍ່ 9 ກຸ່ມຮຽກຮ້ອງໃຫ້ຮ່ວມໃຈກັນຢຸດກິດຈະການທາງເສດຖະກິດ ເພື່ອຕໍ່ຕ້ານລັດຖະປະຫານຂອງກອງທັບມຽນມາ.
ຜູ້ປະທ້ວງບາງຄົນໂບກຜ້າສິ້ນຂອງແມ່ຍິງ ໃນຂະນະດຽວກັນກໍ່ມີຄົນນຳຜ້າສິ້ນມາພາດຕາມຖະໜົນເນື່ອງໃນວັນແມ່ຍິງສາກົນ ວັນທີ 8 ມີນາ ເພື່ອເປັນການປະນາມກອງທັບມຽນມາໄປໃນຕົວ ເຊິ່ງຕາມຄວາມເຊື່ອບູຮານ ຜູ້ຊາຍທີ່ຍ່າງລອດຜ້າສິ້ນຈະເກີດໂຊກຮ້າຍ ຫຼື ອາຄົມເສື່ອມ.
ນອກຈາກນີ້, ຍັງມີລາຍງານວ່າ ທ່ານ ຂິ່ນ ເໝົ່າ ລັດ ເຈົ້າໜ້າທີ່ພັກສັນຕິບານແຫ່ງຊາດເພື່ອປະຊາທິ ປະໄຕ ທີ່ທ່ານ ນາງ ອອງ ຊານ ຊູຈີ ເປັນຜູ້ນຳເສຍຊີວິດລະຫວ່າງຖືກຕຳຫຼວດຄວບຄຸມ.
ໃນຂະນະດຽວກັນ ຜູ້ປະທ້ວງ 2 ຄົນໃນເມອງ ມິດຈີນາ ຖືກຕຳຫຼວດຍິງຈົນເສຍຊີວິດ ແລະ ມີຄົນໄດ້ຮັບບາດເຈັບຈຳນວນຫຼາຍ.
ສ່ວນທີ່ເມືອງ ທວາຍ ທາງພາກໃຕ້ຂອງປະເທດ ຜູ້ປະທ້ວງໄດ້ຮັບການດູແລຈາກກອງທັງສະຫະພາບແຫ່ງຊາດກະຫຼ່ຽງ ເຊິ່ງເປັນກຸ່ມຕິດອາວຸດທີ່ເຮັດສົງຄາມມາຍາວນານເພື່ອຕໍ່ຕ້ານທະຫານມຽນມາ.
ຮຽບຮຽງຂ່າວ: ພຸດສະດີ