ສຳນັກຂ່າວຕ່າງປະເທດລາຍງານຈາກປະເທດເຄນຢາ ເມື່ອວັນທີ 4 ມີນາ 2021 ວ່າ ຄຳຖະແຫຼງການຂອງອົງການລະຫວ່າງປະເທດເພື່ອການໂຍກຍ້າຍຖິ່ນຖານ ຫຼື IOM ລະບຸວ່າ ເຮືອບັນທຸກຜູ້ອົບພະຍບປະມານ 200 ຄົນ ອອກເດີນທາງຈາກທ່າເຮືອເມືອງໂອບ໊ອດ ຊາຍຝັ່ງທະເລຈີບູຕີ ເມື່ອເວລາປະມານ 2:00 ໂມງ ຂອງວັນພຸດທີ່ຜ່ານມາ ເພື່ອຂ້າມອ່າວເອເດນໄປທີ່ເຢເມນ ແຕ່ເມື່ອເຮືອອອກເດີນທາງໄປໄດ້ 30 ນາທີ ກຸ່ມພວກລັກລອບນຳຜູ້ອົບພະຍົບຂ້າມແດນກ່າວວ່າ ມີຄົນຢູ່ເທິງເຮືອຫຼາຍເກີນໄປ ກ່ອນຈະຊ່ວຍກັນຈັບຜູ້ອົບພະຍົບໂຍນລົງທະເລກວ່າ 80 ຄົນ.
ຄຳຖະແຫຼງການກ່າວວ່າ ໜ່ວຍກູ້ໄພສາມາດຊ່ວຍເຫຼືອຜູ້ອົບພະຍົບທີ່ຖືກໂຍນລົງທະເລໃນອ່າວເອເດນໄດ້ກວ່າ 50 ຄົນ ນຳກັບເຂົ້າຝັ່ງຈີບູຕີ ສ່ວນທີ່ເຫຼືອກວ່າ 20 ຄົນສູນຫາຍ ແລະ ພົບເປັນສົບແລ້ວ 5ຄົນ ກຳລັງອອກຕິດຕາມສ່ວນທີ່ເຫຼືອ.
ເຈົ້າໜ້າທີ່ IOM ເປີດເຜີຍວ່າ ຈີບູຕີເປັນທາງຜ່ານສຳຄັນ ສຳລັບຜູ້ອົບພະຍົບຈາກແອຟຣິກາ ທີ່ລັກລອບເດີນທາງເຂົ້າສູ່ກຸ່ມປະເທດຮັ່ງມີໃນຕະເວັນອອກກາງ ໂດຍຜ່ານປະເທດເຢເມນ ຂໍ້ມູນຈາກການບັນທຶກຂອງ IOM ມີຜູ້ອົບພະຍົບຜ່ານເສັ້ນທາງນີ້ 138,000ຄົນ ໃນປີ 2019 ແຕ່ຈຳນວນຫຼຸດລົງເຫຼືອ 37,500ຄົນ ໃນປີ 2020 ເນື່ອງຈາກການລະບາດຂອງໂຄວິດ-19.
ໃນເບື້ອງຕົ້ນຍັງບໍ່ຊັດເຈນວ່າ ຜູ້ອົບພະຍົບຫຼ້າສຸດມາຈາກປະເທດໃດແນ່ ແຕ່ຈາກການເປີດເຜີຍຂອງຜູ້ລອດຊີວິດທີ່ໄດ້ຮັບການຊ່ວຍເຫຼືອລະບຸວ່າ ສ່ວນໃຫຍ່ເປັນຊວເອທິໂອເປຍ ແລະ ໂຊມາເລຍ.
ຮຽບຮຽງຂ່າວ: ພຸດສະດີ